મુંબઈ : પ્રાથમિક શેરબજાર એટલે કે મેન બોર્ડ સેગમેન્ટમાં નવો IPO લાવવા માટે કંપનીઓ વચ્ચે ભારે હોડ જામી છે, ત્યારે આ રેસમાં હવે વધુ એક પ્રખ્યાત જ્વેલરી બ્રાન્ડનું નામ ઉમેરાવા જઈ રહ્યું છે. લેબ-ગ્રોન ડાયમંડ-સ્ટડેડ ગોલ્ડ જ્વેલરીના ઉત્પાદન અને ડિઝાઇનિંગ સાથે સંકળાયેલી નિત્યાસ જેમ્સ એન્ડ જ્વેલરી લિમિટેડ કંપની પોતાનો ₹108.35 કરોડનો પબ્લિક ઇશ્યૂ (IPO) લઈને આવી રહી છે. આ IPO રોકાણકારો માટે આગામી 30 સપ્ટેમ્બરના રોજ ખુલશે અને 5 ઓક્ટોબર સુધી બુકિંગ કરી શકાશે.

આ જાહેર ભરણ દ્વારા કંપની 1.45 કરોડ નવા શેર ઇશ્યૂ કરશે. જેના માટે શેરદીઠ ₹70 થી ₹75 ની પ્રાઇસ બેન્ડ નક્કી કરવામાં આવી છે, જ્યારે મિનિમમ લોટ સાઈઝ 200 શેરની રાખવામાં આવી છે. 6 ઓક્ટોબરે શેરની ફાળવણી (Allotment) આખરી કરવામાં આવશે અને 8 ઓક્ટોબરના રોજ કંપનીના શેરનું NSE અને BSE પર ગ્રાન્ડ લિસ્ટિંગ થશે. આ ઇશ્યૂ માટે ચોઇસ કેપિટલ એડવાઇઝર્સ બુક રનિંગ લીડ મેનેજર છે અને બિગશેર સર્વિસિસ રજિસ્ટ્રાર તરીકે સેવા આપી રહી છે.

કંપનીના નાણાકીય સ્વાસ્થ્ય અંગે વાત કરીએ તો, નાણાકીય વર્ષ 2025-26 માં કંપનીની આવક 110 ટકાના જંગી ઉછાળા સાથે ₹203.33 કરોડ નોંધાઈ છે, જ્યારે ચોખ્ખો નફો 128 ટકા વધીને ₹22.32 કરોડ થયો છે. સુરતમાં ઉત્પાદન એકમ ધરાવતી આ કંપની ભારત ઉપરાંત કેનેડા, ઓસ્ટ્રેલિયા, તાઇવાન, કેન્યા અને UAE માં પણ જ્વેલરી સપ્લાય કરે છે. GIVA, Palmonas અને Ladia Diamonds જેવા જાણીતા B2B બ્રાન્ડ્સ પણ તેના મુખ્ય ગ્રાહકોમાં સામેલ છે.