શ્રાવસ્‍તી,તા.૧૫: ઉત્તર પ્રદેશના શ્રાવસ્‍તી જિલ્‍લાના બસભરિયા ગામમાં એક ગાય લગભગ સાતેક દિવસથી ખેતરમાં સતત ગોળ-ગોળ ઘૂમી રહી હોવાથી ચર્ચાનો વિષય બની છે. શરૂઆતમાં તો ખેડૂતને લાગ્‍યું કે અમસ્‍તી જ આમતેમ ફરતી હશે, પરંતુ એક આખો દિવસ તે રોકાયા વિના સતત ગોળ-ગોળ ઘૂમતી જ રહી. જ્‍યારે ગાયે ચારો ખાવા માટે પણ રોકાવાનું બંધ કરી દીધું ત્‍યારે ખેડૂતને ચિતા થઈ. આસપાસના લોકોને વાત કરી તો લોકો એ ગાયને અતિ પવિત્ર માનીને એની પૂજા કરવા એકઠા થવા લાગ્‍યા. ખાધા-પીધા વિના સતત ગોળ-ગોળ ચક્કર લગાવવાને કારણે તેની હાલત નબળી પડી રહી હતી. એમ છતાં ગાય રોકાવાનું નામ નહોતી લેતી એટલે કોઈ ડાહ્યો માણસ પ્રાણીઓના ડોક્‍ટરને બોલાવી લાવ્‍યો. ડોક્‍ટરોના મતે આ ન્‍યુરોલોજિકલ ડિસઑર્ડરનું લક્ષણ હોઈ શકે છે. ગાયની નર્વસ સિસ્‍ટમ શાંત પડે એ માટે ડોક્‍ટરોએ એને પકડીને દવા અને ઇન્‍જેક્‍શન આપ્‍યાં હતાં. સારવાર દરમ્‍યાન ગાયની આંખમાંથી આંસુ સરી પડ્‍યાં હતાં, પરંતુ એ પછી પણ થોડી જ વારમાં તેનું ગોળ ચક્કર ચાલુ થઈ ગયું હતું.