અયોધ્‍યા, તા.૨૬: દેશના સૌથી ભવ્‍ય અને કરોડો ભક્‍તોની આસ્‍થાના કેન્‍દ્ર સમાન અયોધ્‍યાના શ્રી રામ મંદિરમાંથી એક ચોંકાવનારો કિસ્‍સો સામે આવ્‍યો છે, જેણે સમગ્ર દેશને હચમચાવી દીધો છે. મંદિરમાં પ્રભુ રામના પ્રસાદ અને ભક્‍તો દ્વારા અર્પણ કરવામાં આવતા દાનના ભંડોળમાં મોટી નાણાકીય ગેરરીતિઓ આચરવામાં આવી હોવાનો પર્દાફાશ થયો છે. શ્રી રામ જન્‍મભૂમિ તીર્થ ક્ષેત્ર ટ્રસ્‍ટના સભ્‍ય શ્રી કળષ્‍ણ મોહનની સત્તાવાર ફરિયાદના આધારે અયોધ્‍યા પોલીસ સ્‍ટેશનમાં આ મામલે હડકંપ મચાવનારી એફઆઈઆર (FIR) દાખલ કરવામાં આવી છે. આ કાર્યવાહી સ્‍પેશિયલ ઇન્‍વેસ્‍ટિગેશન ટીમ (SIT) ના પ્રાથમિક તપાસ અહેવાલના સનસનાટીભર્યા ખુલાસાઓ બાદ કરવામાં આવી છે, જેમાં આઠ જેટલા લોકો આ કથિત મહાકૌભાંડની રડારમાં આવ્‍યા છે.

આ હાઈ-પ્રોફાઈલ કેસની ગંભીરતાને જોતા ઉત્તર પ્રદેશની યોગી આદિત્‍યનાથ સરકારે ગુનેગારોને પાઠ ભણાવવા માટે કડક કલમો હેઠળ કાનૂની સકંજો કસ્‍યો છે. પોલીસના જણાવ્‍યા અનુસાર, અનુકલ્‍પ મિશ્રા અને તિનુ યાદવ જેવા મુખ્‍ય નામો સહિત અન્‍ય શંકાસ્‍પદો સામે ફોજદારી કાર્યવાહી સંહિતા (CrPC) ની કલમ ૩૦૬, ૩૧૬(૫), ૩૧૭(૪), ૩૧૭(૫), ૬૧ અને ૩(૫) હેઠળ ગુનો નોંધીને તપાસનો ધમધમાટ શરૂ કરાયો છે. એસઆઈટીના અહેવાલમાં સ્‍પષ્ટપણે એવા લોકોની સંડોવણી દર્શાવવામાં આવી છે જેઓ સીધા જ દાન ભંડોળની દેખરેખ, રોકડની ગણતરી, બેંકિંગ પ્રક્રિયાઓ અને મંદિરના સુરક્ષા ચક્ર સમાન CCTV ફૂટેજ જાળવવાની મહત્‍વપૂર્ણ જવાબદારી સંભાળતા હતા. વહીવટીતંત્રે તાત્‍કાલિક પગલાં ભરીને બેંક થાપણોની ગણતરી સાથે જોડાયેલા તમામ શંકાસ્‍પદ સ્‍ટાફને ફરજ પરથી હટાવી દીધો છે.

આ મામલે પ્રદેશના મુખ્‍યમંત્રી યોગી આદિત્‍યનાથ પોતે એક્‍શન મોડમાં આવ્‍યા છે અને તેમણે પ્રાથમિક અહેવાલ મેળવીને દોષિતો સામે દાખલારૂપ પગલાં લેવાના આદેશ આપ્‍યા છે, તેમજ આગામી બે અઠવાડિયામાં સમગ્ર નેટવર્કનો પર્દાફાશ કરતો વિગતવાર રિપોર્ટ રજૂ કરવા SIT ને અલ્‍ટીમેટમ આપ્‍યું છે. બીજી તરફ, આ વિવાદ વચ્‍ચે કારસેવકપુરમના પ્રભારી અને સાકેત ભવનના પીઠાધીશ્વર સીતારામ દાસ જી મહારાજે લોકોને અફવાઓથી દૂર રહેવાની અપીલ કરી છે. તેમણે દાવો કર્યો છે કે રામ મંદિરમાં ભક્‍તોની એકપ્રએક પાઇ અને કિંમતી વસ્‍તુઓ સંપૂર્ણ સુરક્ષિત છે અને જેમને શંકા હોય તે પોતે આવીને પારદર્શિતા જોઈ શકે છે. હાલમાં પોલીસ અને એસઆઈટી આ ચોરી પાછળ કામ કરતા આખા નેટવર્ક અને અપ્રમાણસર અસ્‍કયામતોના પુરાવા એકત્રિત કરવા માટે રાત-દિવસ એક કરી રહી છે.