નવી દિલ્હી: દિલ્હી-NCRમાં દિવાળીનો ઉત્સાહ રવિવારે રાત્રે અનેક પરિવાર માટે કાળમુખો સાબિત થયો હતો. લક્ષ્મી પૂજન બાદ શરુ થયેલી આતશબાજી વચ્ચે દિલ્હી અને આસપાસના શહેરોમાં આગના અનેક બનાવો બનતા ગભરાટ ફેલાયો હતો. આ દરમિયાન દિલ્હીમાં દાડમ પ્રગટાવતી વખતે સર્જાયેલા અકસ્માતમાં ૧૦ વર્ષના એક માસૂમ બાળકનું કરુણ મોત નીપજ્યું હતું, જ્યારે ગાઝિયાબાદ અને ગુરુગ્રામ જેવા શહેરોમાં હાઇરાઇઝ સોસાયટીના ફ્લેટ, દુકાન તેમજ ફેક્ટરીમાં ભીષણ આગ લાગવાની ઘટનાઓ સામે આવી હતી.

અકસ્માતોની વિગતો મુજબ, ગાઝિયાબાદના ક્રોસિંગ્સ રિપબ્લિક વિસ્તારમાં આવેલી GH-7 સોસાયટીના ટાવર નંબર 7 ના દસમા માળે બંધ ફ્લેટમાં રવિવારે રાત્રે અચાનક વિકરાળ આગ ભભૂકી ઊઠી હતી. ધુમાડાના ગોટેગોટા નીકળતા જ ક્રોસિંગ્સ રિપબ્લિક અને કોતવાલી ફાયર સ્ટેશનથી ફાયર એન્જિનો ઘટનાસ્થળે દોડી ગયા હતા. આગની ભયાનકતાને ધ્યાને લઈને વૈશાલી ફાયર સ્ટેશનથી ખાસ હાઇડ્રોલિક પ્લેટફોર્મ પણ બોલાવવું પડ્યું હતું. બીજી તરફ ગુરુગ્રામના ધમધમતા સદર બજારમાં આવેલી એક દુકાન તેમજ ગાઝિયાબાદની એક ફેક્ટરીમાં ફટાકડાની તણખાથી આગ ફાટી નીકળતા મોટું આર્થિક નુકસાન થયું હતું.

દિલ્હીમાં બનેલી કરુણ ઘટનામાં ૧૦ વર્ષીય બાળક ફટાકડામાં દાડમ પ્રગટાવી રહ્યો હતો ત્યારે અચાનક થયેલા ધડાકા સાથે આગની ઝપેટમાં આવી જતાં તેનું હોસ્પિટલ પહોંચાડાય તે પહેલા જ મોત થયું હતું. ગાઝિયાબાદની સોસાયટીમાં બંધ ફ્લેટ હોવાથી કોઈ જાનહાનિ થઈ નહોતી પરંતુ આજુબાજુના ફ્લેટ ધારકોમાં ભારે ફફડાટ વ્યાપી ગયો હતો. ફાયર ફાઇટરોએ કલાકોની ભારે જહમત બાદ તમામ સ્થળોએ આગ પર પૂર્ણ કાબૂ મેળવ્યો હતો.

આ ઘટનાઓના પગલે દિલ્હી અને NCRના પોલીસ પ્રશાસન દ્વારા ફટાકડાના કારણે થયેલા અકસ્માતો અને આગના કારણો અંગે ઊંડાણપૂર્વક તપાસ હાથ ધરવામાં આવી છે. મૃતક બાળકના પરિવારને જરૂરી સહાય આપવાની પ્રક્રિયા સાથે અકસ્માતનો કેસ નોંધવામાં આવ્યો છે. આ ઉપરાંત, ભવિષ્યમાં હાઇરાઇઝ સોસાયટીઓમાં ફાયર સેફ્ટી ઇક્વિપમેન્ટ્સની કાર્યક્ષમતા ચકાસવા માટે દિલ્હી-NCRના ફાયર વિભાગ દ્વારા સોસાયટીઓ અને ગીચ બજારોમાં કડક ઓડિટ ઝુંબેશ ચલાવવાની કવાયત હાથ ધરાઈ છે.