ગુરૂગ્રામ : અક્ષિત ખેરા નામના ૧૭ વર્ષીય યુવાને સાબિત કરી બતાવ્યું છે કે મોટી એન્જિનિયરોની ટીમ કે મોંઘી વર્કશોપ વગર પણ દ્રઢ મનોબળ અને જિજ્ઞાસાથી ક્રાંતિકારી કામ થઈ શકે છે. ધોરણ ૧૨ની બોર્ડની પરીક્ષાઓ વચ્ચે વ્યસ્ત રહેવા છતાં, ગુરૂગ્રામની 'હેરિટેજ ઇન્ટરનેશનલ એક્સપિરિએન્શિયલ સ્કૂલ'માં અભ્યાસ કરતા અક્ષિતે પોતાની આગવી સૂઝબૂઝથી માત્ર ૧,૦૨,૫૩૬ રૂપિયાના અંદાજિત બજેટમાં એક બહુહેતુક સોલર-આસિસ્ટડ થ્રી-વ્હીલર તૈયાર કર્યું છે. આ વાહનમાં હવામાન સામે રક્ષણ આપતી બે બેઠકોવાળી કેબિન, કાર્ગો બોક્સ અને ૪૦૦ વોટની સોલર પેનલવાળી કેનોપી ફીટ કરવામાં આવી છે.

આ પ્રેરણાદાયી પ્રોજેક્ટ પાછળનું મુખ્ય કારણ અક્ષિતના પરિવાર દ્વારા કરવામાં આવેલું સ્થળાંતર અને મોંઘું પરિવહન હતું. પરિવારના મોભી ડ્રાઈવર તરીકે કામ કરતા હોવાથી માલસામાનની હેરફેર માટે ઇલેક્ટ્રિક લોડરની આવશ્યકતા હતી, પરંતુ બજારમાં મળતા ૧.૫ થી ૨ લાખ રૂપિયાના વાહનો તેમની પહોંચ બહાર હતા. આ મુશ્કેલી દૂર કરવા અક્ષિતે ૨૦ જેટલા પરિવારો સાથે ચર્ચા કરી એક પરવડે તેવું અને બહુઉપયોગી વાહન બનાવવાનો સંકલ્પ લીધો, જે માત્ર સિમ્યુલેશન નહીં પરંતુ વાસ્તવિક જમીની સ્તરે કામ કરી શકે.

બજેટને મર્યાદિત રાખવા અને ગુણવત્તા જાળવવા માટે અક્ષિતે લેડ-એસિડ બેટરીને બદલે લાંબુ આયુષ્ય ધરાવતી લિથિયમ-આયન બેટરી પસંદ કરી હતી. ૫૦ કિલોમીટરનું અંતર કાપવા માટે આ વાહન આશરે ૨.૪૬ યુનિટ વીજળી વાપરે છે, જેમાંથી ૬૩ ટકા જરૂરિયાત સોલર ઊર્જા પૂરી પાડે છે. આ ટેક્નોલોજીના કારણે વાહનનો ચલાવવાનો ખર્ચ માત્ર ૧૩ પૈસા પ્રતિ કિલોમીટર જેટલો નહિવત આવે છે, જે સામાન્ય પરિવારો માટે ખૂબ જ રાહતરૂપ સાબિત થઈ રહ્યો છે.

આ સફળતા બાદ હવે આ યુવાન ઇનોવેટર અન્ય જરૂરિયાતમંદ પરિવારો અને નાના વેપારીઓ સુધી આ તકનીક પહોંચાડવાની દિશામાં વિચારી રહ્યો છે. અક્ષિતના આ સફળ પ્રયોગથી માત્ર તેના પરિવારની રોજિંદી મુશ્કેલીઓ જ હલ નથી થઈ, પરંતુ પર્યાવરણને અનુકૂળ અને સસ્તી ગ્રીન એનર્જી મોબીલિટી ક્ષેત્રે એક નવો રાહ પણ ચીંધાયો છે. આગામી સમયમાં આ મોડેલનું વ્યાપારીકરણ કરવા માટે સ્થાનિક સ્તરે સહયોગ મેળવવાની તકો પણ તપાસવામાં આવી રહી છે.