નવી દિલ્હી : આજના ડિજિટલ યુગમાં આર્ટિફિશિયલ ઈન્ટેલિજન્સ (AI) નો ઉપયોગ ઝડપથી વધી રહ્યો છે, ત્યારે શાળા-કોલેજોમાં તેના ખોટા ઉપયોગ અને કોપી-પેસ્ટ (પ્લેજિઆરિઝમ)ને રોકવા માટે પ્રતિબંધો લાદવામાં આવી રહ્યા છે. મોટાભાગના વિદ્યાર્થીઓ આવા નિયમો સામે લાચાર થઈ જતા હોય છે, પરંતુ ભારતીય મૂળની ૧૭ વર્ષીય વિદ્યાર્થિની નવ્યા તુટેજાએ આ પ્રતિબંધને જ પોતાની સફળતાનો માર્ગ બનાવી દીધો છે. સ્કૂલમાં ChatGPT પર રોક લાગતા નવ્યાએ અટકી જવાને બદલે પોતાની કોડિંગ સ્કિલનો ઉપયોગ કરીને 'રાહા' (Raaha) નામનું એક અનોખું AI પ્લેટફોર્મ તૈયાર કરી નાખ્યું છે.

નવ્યાનું માનવું હતું કે ટેકનોલોજી પર સંપૂર્ણ પ્રતિબંધ મૂકવો એ કોઈ કાયમી ઉકેલ નથી, પરંતુ એઆઈનો સકારાત્મક, શૈક્ષણિક અને રચનાત્મક ઉપયોગ શીખવવો વધુ જરૂરી છે. આ વિચાર સાથે તેણે 'રાહા' પ્લેટફોર્મ ડિઝાઈન કર્યું, જે માત્ર તૈયાર જવાબો આપવાને બદલે વિદ્યાર્થીઓ અને યુવાનો માટે એક વાસ્તવિક માર્ગદર્શક (Mentor) તરીકે કામ કરે છે. આ પ્લેટફોર્મ વિદ્યાર્થીઓને તેમની ક્ષમતા અને રસ મુજબ શ્રેષ્ઠ કરિયર ઓપ્શન્સ પસંદ કરવામાં અને વિષયના કોન્સેપ્ટ સમજવામાં મદદરૂપ થાય છે.

આજે આ સ્ટાર્ટઅપ દ્વારા નોકરી શોધતા હજારો યુવાનોને સીધી મદદ મળી રહી છે. 'રાહા' પ્લેટફોર્મ જોબ સીકર્સ માટે ATS-ફ્રેન્ડલી રેઝ્યૂમે (CV) તૈયાર કરી આપે છે અને તેમની પ્રોફાઈલ મુજબ યોગ્ય નોકરીઓ શોધવામાં મદદ કરે છે. માત્ર ૧૭ વર્ષની નાની વયે શિક્ષણ અને રોજગાર ક્ષેત્રે એઆઈનો જવાબદારીપૂર્વક ઉપયોગ કરીને નવ્યા તુટેજા આજે વૈશ્વિક સ્તરે યુવા ઇનોવેટર્સ માટે પ્રેરણાસ્રોત બની ગઈ છે, અને ટેક નિષ્ણાતો પણ તેના આ પ્રયાસને બિરદાવી રહ્યા છે.