​દિલ્હી: રાજધાની દિલ્હીના પોશ ગણાતા દક્ષિણ દિલ્હી વિસ્તારમાં આવેલ સત્ય નિકેતનમાંથી એક અત્યંત હૃદયકંપાવનારી દુર્ઘટનાના સમાચાર સામે આવ્યા છે. અહીં આવેલા એક પીજી (પેઇંગ ગેસ્ટ) તરીકે વપરાતા પાંચ માળના મકાનમાં અચાનક મોટો ધડાકો થયો હતો અને જોતજોતામાં સમગ્ર ઈમારત નિર્દયતાથી જમીનદોસ્ત થઈ ગઈ હતી. આ ભયાનક હોનારતની પૂરેપૂરી ઘટના નજીકમાં લાગેલા સીસીટીવી કેમેરામાં કેદ થઈ ગઈ છે, જેનો 21 સેકન્ડનો વીડિયો સોશિયલ મીડિયા પર વાયરલ થતા જ લોકોમાં ભારે ફફડાટ વ્યાપી ગયો છે.

​સામે આવેલા ૨૧ સેકન્ડના ભયાનક ફૂટેજમાં જોઈ શકાય છે કે સામાન્ય દિવસની જેમ રસ્તા પર વાહનવ્યવહાર અને લોકોની અવરજવર ચાલુ હતી, ત્યારે જ અચાનક પાંચ માળનું આખું મકાન પત્તાના મહેલની જેમ ધરાશાયી થઈ જાય છે. મકાન તૂટી પડવાની સાથે જ સમગ્ર વિસ્તારમાં ધૂળ અને માટીના ઘટ્ટ વાદળો છવાઈ ગયા હતા. ધડાકાનો અવાજ સાંભળીને આસપાસના સ્થાનિક લોકો અને રાહદારીઓ પોતપોતાનો જીવ બચાવવા માટે નાસભાગ કરવા લાગ્યા હતા.

​પ્રાથમિક માહિતી અનુસાર, આ પાંચ માળની બિલ્ડિંગમાં અંદર રિનોવેશનનું કામ ચાલી રહ્યું હતું, તે દરમિયાન અચાનક આ દૂર્ઘટના ઘટી હતી. ઈમારત ધરાશાયી થવાને કારણે મોટી સંખ્યામાં કાટમાળ રસ્તા પર અને આસપાસના વિસ્તારમાં પથરાઈ ગયો હતો. આ ઘટના બાદ તુરંત જ સ્થાનિક પોલીસ અને આપત્તિ વ્યવસ્થાપન (ફાયર બ્રિગેડ અને એનડીઆરએફ)ની ટીમ સ્થળ પર પહોંચી ગઈ હતી અને કાટમાળ હટાવીને નીચે દબાયેલા લોકોને બહાર કાઢવા માટે મોટા પાયે બચાવ કામગીરી શરૂ કરી દેવામાં આવી હતી. દિલ્હી તંત્રે આ મામલે તપાસના આદેશ આપ્યા છે.