ધાર: મધ્યપ્રદેશના ઐતિહાસિક અને વિવાદાસ્પદ ભોજશાલા પરિસર અંગે હાઈકોર્ટ દ્વારા આપવામાં આવેલા તાજેતરના મહત્વના ચુકાદા બાદ પ્રથમ શુક્રવારે અહી ભારે ગરમા ગરમી જોવા મળી હતી. કોર્ટના આદેશને પગલે હિન્દુ સંગઠનો દ્વારા ભોજશાલા મિશ્રિત પરિસરમાં એક ભવ્ય મહાઆરતીનું આયોજન કરવામાં આવ્યું હતું. આ ધાર્મિક કાર્યક્રમમાં મોટી સંખ્યામાં શ્રદ્ધાળુઓ ઉમટી પડ્યા હતા અને વાતાવરણ ભક્તિમય બની ગયું હતું.

બીજી તરફ, હાઈકોર્ટના આ ચુકાદા સામે મુસ્લિમ સમાજમાં ભારે નારાજગી જોવા મળી હતી. વિરોધ પ્રદર્શનના ભાગરૂપે મુસ્લિમ સમુદાયના લોકોએ આ શુક્રવારે મસ્જિદ અથવા ભોજશાલા પરિસરમાં જવાના બદલે પોતપોતાના ઘરોમાં જ નમાઝ અદા કરવાનો સામૂહિક નિર્ણય લીધો હતો. આ વિરોધને વધુ સ્પષ્ટ કરવા માટે લઘુમતી સમાજના પુરુષો અને યુવાનોએ પોતાના હાથ પર કાળી પટ્ટીઓ બાંધી રાખી હતી.

સ્થાનિક મુસ્લિમ અગ્રણીઓ અને મૌલવીઓના જણાવ્યા અનુસાર, કોર્ટના આ નિર્ણયથી તેમના ધાર્મિક અધિકારો પર અસર પડી રહી છે, જેના કારણે તેઓએ આ અનોખી રીતે પોતાનો શાંતિપૂર્ણ વિરોધ નોંધાવ્યો છે. પરિસરમાં કોઈ અપ્રિય ઘટના ન ઘટે તે માટે વહીવટી તંત્ર દ્વારા વહેલી સવારથી જ સમગ્ર વિસ્તારમાં લોખંડી પોલીસ બંદોબસ્ત તૈનાત કરી દેવામાં આવ્યો હતો. ઉચ્ચ પોલીસ અધિકારીઓ જાતે પરિસ્થિતિ પર નજર રાખી રહ્યા હતા.

ભોજશાલા સરસ્વતી મંદિર અને કમાલ મૌલા મસ્જિદ તરીકે ઓળખાતા આ સ્થળ પર વર્ષોથી બંને પક્ષો વચ્ચે વિવાદ ચાલી રહ્યો છે. અગાઉની વ્યવસ્થા મુજબ શુક્રવારે મુસ્લિમોને નમાઝ પઢવાની અને મંગળવારે હિન્દુઓને પૂજા કરવાની મંજૂરી હતી, પરંતુ હાઈકોર્ટના નવા આદેશ બાદ પરિસ્થિતિ બદલાઈ છે. હાલમાં સમગ્ર ધાર જિલ્લામાં શાંતિ જળવાઈ રહી છે પરંતુ અંદરખાને તણાવપૂર્ણ માહોલ જોવા મળી રહ્યો છે.