રાસ તનુરા:સાઉદી અરેબિયાના રાસ તનુરા ઓઇલ રિફાઇનરી ટર્મિનલ પર રવિવારના રોજ સાઉદીની દિગ્ગજ ઓઇલ કંપની 'અરામકો' નું એક હેલિકોપ્ટર અચાનક તૂટી પડતાં મોટી દુર્ઘટના સર્જાઈ છે. સાઉદી અરેબિયાની સરકારી સમાચાર એજન્સીના અહેવાલ મુજબ, આ ભયાનક હેલિકોપ્ટર અકસ્માતમાં સવાર તમામ ૧૪ લોકોના ઘટનાસ્થળે જ કમકમાટીભર્યા મોત નીપજ્યા છે. સત્તાવાર માહિતી અનુસાર, અકસ્માતનો ભોગ બનેલા તમામ ૧૪ પીડિતો સાઉદી અરેબિયાના જ વતની અને નાગરિકો હતા.

અકસ્માતનું કારણ અકબંધ, તપાસ તેજ:

આ હેલિકોપ્ટર કયા કારણોસર તૂટી પડ્યું તે અંગે પ્રાથમિક તબક્કે કોઈ ચોક્કસ માહિતી મળી શકી નથી. સરકારી સમાચાર એજન્સીએ જણાવ્યું છે કે દુર્ઘટના પાછળના ટેકનિકલ કે અન્ય કારણો શોધવા માટે વહીવટી તંત્ર દ્વારા વ્યાપક તપાસ શરૂ કરી દેવામાં આવી છે. સંબંધિત ઉચ્ચ સત્તાધિકારીઓની ભાગીદારી સાથે આ હેલિકોપ્ટર ક્રેશ થવાના ચોક્કસ કારણો નક્કી કરવા માટેની તપાસ હાલ પ્રગતિમાં છે.

ચાર મહિના બાદ ટર્મિનલ શરૂ થતાં જ દુર્ઘટના:

ભૌગોલિક દ્રષ્ટિએ રાસ તનુરા એ હોર્મુઝની સામુદ્રધુની (Strait of Hormuz) ના પૂર્વીય પશ્ચિમ કિનારે આવેલું અત્યંત વ્યૂહાત્મક સ્થળ છે. મધ્ય પૂર્વમાં અમેરિકા, ઇઝરાયેલ અને ઇરાન વચ્ચે ચાલી રહેલા ભીષણ યુદ્ધના કારણે આ મહત્ત્વપૂર્ણ રાસ તનુરા ટર્મિનલ પર ઓઇલ લોડિંગની કામગીરી છેલ્લાં લગભગ ચાર મહિનાથી સંપૂર્ણપણે બંધ હાલતમાં હતી. આ યુદ્ધગ્રસ્ત સ્થિતિ વચ્ચે ઓઇલ કંપની અરામકો દ્વારા હજુ ગત શુક્રવારે જ ખાડી વિસ્તારના આ અત્યંત મહત્વના ટર્મિનલ પર ક્રૂડ ઓઇલનું લોડિંગ પુનઃ શરૂ કરવામાં આવ્યું હતું, જેની ગણતરીના દિવસોમાં જ આ દુર્ઘટના ઘટી છે.

વૈશ્વિક સ્તરે ઓઇલ નિકાસ વધારવાની હોડ વચ્ચે ઘટના:

વિશ્વના સૌથી મોટા ઓઇલ નિકાસકાર દેશ એવા સાઉદી અરેબિયાએ તાજેતરમાં જ વૈશ્વિક બજારમાં મોટા પ્રમાણમાં કાર્ગો મોકલવાની પ્રક્રિયા તેજ કરી છે. અમેરિકા અને ઇરાન વચ્ચે યુદ્ધ વિરામ માટે વચગાળાની ડીલ થાય તે પહેલાં, મધ્ય પૂર્વના દેશોએ ઓઇલ અને ગેસનું ઉત્પાદન તેમજ નિકાસ ઝડપથી વધારવા માટે હોડ લગાવી છે, જેમાં સાઉદી અરેબિયા પણ જોડાયું છે. આ વ્યાપક હલચલ અને તેજીથી શરૂ કરાયેલી કામગીરી વચ્ચે જ આ જીવલેણ વિમાન અકસ્માત સર્જાયો છે.