કોલકાતા: પશ્ચિમ બંગાળના રાજકીય ઈતિહાસમાં સોમવારે એક અભૂતપૂર્વ વળાંક આવ્યો છે. ભારતીય જનતા પાર્ટીના નેતા સુભેન્દુ અધિકારી ફરી એકવાર પશ્ચિમ બંગાળની રાજનીતિમાં મહાનાયક બનીને ઉભર્યા છે. અગાઉ નંદીગ્રામમાં મમતા બેનર્જીને પરાજય આપ્યા બાદ, હવે સુભેન્દુ અધિકારીએ મુખ્યમંત્રીના સૌથી સુરક્ષિત ગણાતા 'અભેદ્ય કિલ્લા' ભવાનીપુર બેઠક પર મમતા બેનર્જીને 15,000 મતોના જંગી અંતરથી હરાવીને ઈતિહાસ રચી દીધો છે.

ભવાનીપુરમાં મમતાનો ગઢ ધરાશાયી

પશ્ચિમ બંગાળ વિધાનસભા ચૂંટણી 2026ના પરિણામોએ ભારતીય રાજકારણમાં એક મોટો ભૂકંપ લાવી દીધો છે. જે બેઠક મમતા બેનર્જી માટે સૌથી સુરક્ષિત માનવામાં આવતી હતી, ત્યાં જ જનતાએ પરિવર્તનનો મિજાજ બતાવ્યો છે. સુભેન્દુ અધિકારીએ આ બેઠક પર શરૂઆતથી જ પોતાની પકડ જાળવી રાખી હતી અને અંતે મમતા બેનર્જીને તેમના જ ઘર આંગણે પરાજિત કર્યા હતા. આ જીત માત્ર સુભેન્દુ અધિકારીનું વધતું કદ જ નહીં, પરંતુ બંગાળમાં ભાજપની મજબૂત સ્વીકૃતિ પણ દર્શાવે છે.

મમતા બેનર્જીની સૌથી મોટી વ્યક્તિગત હાર

રાજકીય વિશ્લેષકો આ પરિણામને મમતા બેનર્જીના રાજકીય કરિયરની સૌથી મોટી વ્યક્તિગત હાર તરીકે જોઈ રહ્યા છે. પશ્ચિમ બંગાળમાં મમતા બેનર્જી માત્ર સત્તામાંથી બહાર જ નથી થયા, પરંતુ પોતાની પરંપરાગત બેઠક ગુમાવવી એ તેમના નેતૃત્વ પર મોટો સવાલ ઉભો કરે છે. બીજી તરફ, સુભેન્દુ અધિકારીએ સાબિત કરી દીધું છે કે તેઓ બંગાળના રાજકારણના નવા યુગના શિલ્પી છે.

આ જીત બાદ ભાજપ છાવણીમાં ભારે ઉત્સાહ જોવા મળી રહ્યો છે, જ્યારે તૃણમૂલ કોંગ્રેસ માટે આ હાર આઘાતજનક સાબિત થઈ છે. ભવાનીપુરના આ પરિણામોએ સ્પષ્ટ કરી દીધું છે કે બંગાળમાં હવે રાજકીય સમીકરણો સંપૂર્ણપણે બદલાઈ ચૂક્યા છે.