મુંબઈ:  મુંબઈના સૌથી પોશ ગણાતા પેડર રોડ પર રહેવું એ ઘણાનું સ્વપ્ન હોય છે, પરંતુ જો તમારું ઘર એશિયાના સૌથી ધનિક વ્યક્તિ મુકેશ અંબાણીના 'એન્ટિલિયા'ની બિલકુલ બાજુમાં હોય, તો તે લક્ઝરીની ચરમસીમા છે. વર્ષ 1938માં બ્રિટિશ આર્કિટેક્ટ ક્લાઉડ બેટલી દ્વારા ડિઝાઇન કરાયેલ ઐતિહાસિક 'માર્લબરો હાઉસ'માં હાલમાં એક ભવ્ય 4BHK ફ્લેટ ભાડે આપવા માટે ખાલી પડ્યો છે. આ બિલ્ડિંગનો ઇતિહાસ એટલો જ રસપ્રદ છે જેટલું તેનું સ્થાપત્ય; જે મૂળ એક જર્મન મહિલા માટે બનાવાયું હતું, પરંતુ વિશ્વયુદ્ધના કારણે તેણે ભારત છોડવું પડ્યું અને આ મહેલ જેવી ઇમારત કામાણી પરિવારના હસ્તક આવી.

આ આધુનિક 4BHK એપાર્ટમેન્ટ માત્ર ચાર દીવાલો નથી, પરંતુ સુવિધાઓનો ખજાનો છે. અંદાજે 3,000 ચોરસ ફૂટમાં ફેલાયેલા આ ઘરની સૌથી મોટી વિશેષતા તેનો 750 ચોરસ ફૂટનો ખાનગી બગીચો છે, જે મુંબઈ જેવા ગીચ શહેરમાં 'દુર્લભ' ગણાય છે. આધુનિક રીનોવેશન બાદ આ ઘરમાં ત્રણ માસ્ટર બેડરૂમ, ચાર બાથરૂમ અને પર્સનલ ડેક બનાવવામાં આવ્યા છે. સોશિયલ મીડિયા પર વાયરલ થયેલા વીડિયો મુજબ, અહીં રહેનારા નસીબદાર ભાડૂતોને પિકબોલ કોર્ટ અને બે કાર પાર્કિંગ જેવી લક્ઝરી સુવિધાઓ પણ મળશે, જે તેમના જીવનધોરણને સાચા અર્થમાં 'વીઆઈપી' બનાવશે.

જોકે, અંબાણીના પડોશી બનવાની કિંમત પણ તેટલી જ તોતિંગ છે. આ વૈભવી ફ્લેટનું માસિક ભાડું ₹12 લાખ રાખવામાં આવ્યું છે. આટલું જ નહીં, આ સોદો કરવા માટે ભાડૂતે ₹72 લાખની તોતિંગ રકમ સિક્યોરિટી ડિપોઝિટ તરીકે જમા કરાવવી પડશે. દક્ષિણ મુંબઈના હૃદય સમાન આ વિસ્તારમાં આર્ટ ડેકો સ્ટાઈલની આ ઇમારત આજે પણ રિયલ એસ્ટેટના શોખીનો અને ઇતિહાસ પ્રેમીઓ માટે આકર્ષણનું કેન્દ્ર બની છે. જેમના માટે સ્ટેટસ અને ઇતિહાસ બંને મહત્વના છે, તેમના માટે આ ઘર મુંબઈના રિયલ એસ્ટેટ માર્કેટનો સૌથી ગ્લેમરસ સોદો સાબિત થઈ શકે છે.