મુંબઈ : સબર્બન મુંબઈમાં લોકલ ટ્રેનની સાથે હવે મેટ્રો નેટવર્ક પણ નાગરિકો માટે પરિવહનની નવી 'લાઈફલાઈન' બની ગયું છે. મુંબઈ મેટ્રો રેલ કોર્પોરેશન લિમિટેડ દ્વારા સંચાલિત એક્વા લાઈન (આરે જેવીએલઆરથી કફ પરેડ) ના સંપૂર્ણ રૂટને એક વર્ષ પૂર્ણ થવા પર એક અત્યંત નોંધપાત્ર સિદ્ધિ હાંસલ થઈ છે, જેમાં આ સમયગાળા દરમિયાન કુલ 7,20,88,738 મુસાફરોએ સલામત અને ઝડપી મુસાફરી કરી છે.

શહેરના પ્રથમ ભૂગર્ભ મેટ્રો કોરિડોર તરીકે આ લાઈનને મુસાફરો તરફથી અપાર પ્રતિસાદ મળ્યો છે. સપ્ટેમ્બર 2026ના આંકડા મુજબ, અઠવાડિયાના દિવસોમાં સરેરાશ દૈનિક મુસાફરી 2,24,602 રહી હતી જ્યારે સપ્તાહના અંતે આ આંકડો 1,31,138 નોંધાયો હતો, જે દર્શાવે છે કે મુંબઈગરાઓ માટે આ માર્ગ દૈનિક અવરજવરનું અભિન્ન અંગ બની ગયો છે.

આ ઐતિહાસિક સિદ્ધિને ચિરંજીવી બનાવવા માટે મુંબઈ મેટ્રો રેલ કોર્પોરેશન દ્વારા બે વિશેષ પહેલ 'એક્વા લાઈન ટાઈમ કેપ્સ્યુલ' અને 'એક્વા લાઈન પાસપોર્ટ એન્ડ સ્ટેમ્પ ટ્રેઈલ' શરૂ કરવામાં આવી રહી છે. ટાઈમ કેપ્સ્યુલ દ્વારા મેટ્રોના નિર્માણ, સંચાલન અને વર્ષ 2026ની યાદગાર ક્ષણોને ભવિષ્યની પેઢીઓ માટે સંગ્રહિત કરવામાં આવશે, જેથી આ મહત્ત્વપૂર્ણ સફરનો ઇતિહાસ સુરક્ષિત રહે.

બીજી તરફ, 'પાસપોર્ટ એન્ડ સ્ટેમ્પ ટ્રેઈલ' પહેલ પ્રવાસપ્રેમીઓ માટે આકર્ષણનું કેન્દ્ર બનશે, જેમાં મુસાફરો વિવિધ સ્ટેશનોની મુલાકાત લઈને ખાસ ડિઝાઇન કરાયેલા સ્ટેમ્પ એકત્ર કરી શકશે અને પોતાની મેટ્રો સફરને વધુ રોમાંચક બનાવી શકશે. આ નવીન પ્રયોગોથી પ્રવાસીઓ અને મેટ્રો પ્રશાસન વચ્ચેનો લગાવ વધુ મજબૂત બનશે.

આ સફળતા વિશે વાત કરતા મુંબઈ મેટ્રો રેલ કોર્પોરેશનનાં મેનેજિંગ ડિરેક્ટર અશ્વિની ભિડેએ મુંબઈના નાગરિકોનો આભાર વ્યક્ત કર્યો હતો. તેમણે જણાવ્યું હતું કે એક વર્ષમાં 7 કરોડથી વધુ મુસાફરો દ્વારા આપવામાં આવેલો ભરોસો એ મુંબઈગરાઓના અતૂટ સમર્થનનું સીધું પરિણામ છે.

આગામી સમયમાં આ ભૂગર્ભ મેટ્રો કોરિડોર મુંબઈની ટ્રાફિક સમસ્યા હળવી કરવામાં અને પરિવહનને વધુ સુવિધાજનક બનાવવામાં વધુ મોટું યોગદાન આપશે તેવી દ્રઢ શ્રદ્ધા વ્યક્ત કરવામાં આવી રહી છે.