કેનબેરા : પશ્ચિમ એશિયા (મિડલ ઈસ્ટ) માં અમેરિકા અને ઈરાન વચ્ચે શરૂ થયેલા ભયાનક સૈન્ય સંઘર્ષને પગલે સમગ્ર વિશ્વ પર ત્રીજા વિશ્વયુદ્ધના વાદળો ઘેરાવા લાગ્યા છે. આ ગંભીર પરિસ્થિતિ પર ઊંડી ચિંતા વ્યક્ત કરતાં ઓસ્ટ્રેલિયાના વિદેશ મંત્રી પેની વોંગે શુક્રવારે વૈશ્વિક મંચ પરથી તાકીદે યુદ્ધવિરામ (Ceasefire) કરવાની હાકલ કરી છે. તેમણે બંને શક્તિશાળી દેશોને હુમલાઓ રોકીને શાંતિ સ્થાપવા અપીલ કરી છે, જેથી પ્રદેશના નિર્દોષ નાગરિકોના જીવ બચાવી શકાય અને વૈશ્વિક અર્થતંત્રને મોટી તબાહીમાંથી ઉગારી શકાય.

હોર્મુઝની સામુદ્રધુનીથી શરૂ થયો વિવાદ, અમેરિકાના ઈરાન પર બોમ્બમારો

આ ભયાનક તણાવની શરૂઆત ત્યારે થઈ જ્યારે ઈરાને આંતરરાષ્ટ્રીય વેપાર માટે અત્યંત મહત્વપૂર્ણ ગણાતી 'હોર્મુઝની સામુદ્રધુની' (Strait of Hormuz) માંથી પસાર થતાં વિવિધ દેશોના વેપારી જહાજોને નિશાન બનાવી હુમલા કર્યા હતા. આ ઉશ્કેરણીજનક પગલાના જવાબમાં, અમેરિકી સેનાએ છેલ્લા બે દિવસમાં ઈરાનની સરહદની અંદર ઘૂસીને તેના અનેક વ્યૂહાત્મક સૈન્ય ઠેકાણાઓ પર વિનાશક એરસ્ટ્રાઈક કરી છે. આ બોમ્બમારામાં ઈરાનની સૈન્ય માળખાગત સુવિધાઓને ભારે નુકસાન પહોંચ્યું છે અને મોટા પાયે જાનહાનિ થવાના પણ અહેવાલ છે.

ઈરાનનો ભયાનક પલટવાર: ૪ દેશોના યુએસ મિલિટરી બેઝ પર ડ્રોન-મિસાઈલ હુમલા

અમેરિકાના આકરા હુમલાથી રોષે ભરાયેલા ઈરાને પણ મધ્યરાત્રિએ મોટો વળતો પ્રહાર કર્યો છે. ઈરાને પાડોશી દેશો એવા કુવૈત, બહેરીન, કતાર અને જોર્ડનમાં આવેલા અમેરિકાના સૈન્ય મથકો (US Military Bases) તેમજ કેટલીક નાગરિક સુવિધાઓ પર એકસાથે સેંકડો બેલિસ્ટિક મિસાઈલો અને સસાઈડ ડ્રોન વડે હુમલા કરીને સમગ્ર પ્રદેશને યુદ્ધના મેદાનમાં ફેરવી દીધો છે. આ વળતા પ્રહાર બાદ મિડલ ઈસ્ટમાં સ્થિતિ કાબૂ બહાર જતી રહી છે.

વૈશ્વિક અર્થતંત્ર ખોરવાઈ જવાની ઓસ્ટ્રેલિયાને ભીતિ

ઓસ્ટ્રેલિયન બ્રોડકાસ્ટિંગ કોર્પોરેશન (ABC) ટેલિવિઝનને આપેલા ઇન્ટરવ્યુમાં વિદેશ મંત્રી પેની વોંગે જણાવ્યું હતું કે, "દુનિયા હવે આ લોહિયાળ સંઘર્ષનો કાયમી અંત જોવા ઈચ્છે છે. પશ્ચિમ એશિયામાં ચાલી રહેલી આ છૂટાછવાઈ અથડામણો માત્ર ત્યાંના સ્થાનિક લોકો માટે જ નહીં, પણ સમગ્ર વિશ્વ માટે જોખમી છે. આ વિસ્તાર વૈશ્વિક તેલ અને વ્યાપારનો મુખ્ય માર્ગ હોવાથી જો આ યુદ્ધ લાંબુ ચાલશે, તો તેની સીધી અને ઘાતક અસર વૈશ્વિક અર્થતંત્ર અને મોંઘવારી પર પડશે. તેથી આ યુદ્ધવિરામ ટકી રહે તે જ અત્યારે સમગ્ર માનવજાતના હિતમાં છે."