મુંબઈ,તા.૧૩: બોમ્‍બે હાઈકોર્ટે પિતાને તેમના પુત્ર અને પુત્રીને માસિક ભરણપોષણ ભથ્‍થું ચૂકવવાનો આદેશ આપતા જણાવ્‍યું હતું કે કોઈ વ્‍યક્‍તિ ફક્‍ત બેરોજગારીનો ઉલ્‍લેખ કરીને તેમના બાળકો પ્રત્‍યેની તેમની કાનૂની જવાબદારીથી છટકી ન શકે.

બોમ્‍બે હાઈકોર્ટની નાગપુર બેન્‍ચ એક વ્‍યક્‍તિ દ્વારા દાખલ કરાયેલી અરજી પર સુનાવણી કરી રહી હતી જેમાં નીચલી કોર્ટના આદેશને પડકારવામાં આવ્‍યો હતો કે તેમને તેમના બાળકોનું ભરણપોષણ ચૂકવવાનું ફરજિયાત છે.

અમરાવતીના બુલઢાણાના રહેવાસી આ વ્‍યક્‍તિને કુલ રૂ.૮,૦૦૦ માસિક ભરણપોષણ ભથ્‍થું ચૂકવવાનો આદેશ આપવામાં આવ્‍યો હતો, જેમાંથી રૂ.૪,૦૦૦ તેમના પુત્રને અને રૂ.૪,૦૦૦ તેમની પુત્રીને આપવાના હતા.

તેમણે આ આદેશને હાઇકોર્ટમાં પડકાર્યો હતો, અને દલીલ કરી હતી કે તેઓ હાલમાં બેરોજગાર છે અને તેમના બાળકો માટે નાણાકીય સહાય પૂરી પાડવા માટે અસમર્થ છે. તેમણે દાવો કર્યો હતો કે તેમણે તેમની આવકનો એકમાત્રસ્ત્રેત, તેમની ઓટો-રિક્ષા પણ વેચી દીધી છે.

જોકે, હાઇકોર્ટે જણાવ્‍યું હતું કે તેઓ તેમની જવાબદારીથી છટકી શકતા નથી. બેન્‍ચે જણાવ્‍યું હતું કે બાળકોનો ઉછેર અને ભરણપોષણ એ પિતાની કાનૂની અને વ્‍યક્‍તિગત જવાબદારી છે. કોર્ટે જણાવ્‍યું હતું કે ૧૦ અને ૭ વર્ષની વયના તેમના બાળકોનો ઉછેર અને ભવિષ્‍ય અવગણી શકાય નહીં.

કોર્ટે જણાવ્‍યું હતું કે બેરોજગારી અથવા ઓછી આવક બાળકો માટેની જવાબદારીથી છટકી જવાનું માન્‍ય કારણ હોઈ શકે નહીં. કોર્ટે એ પણ નોંધ્‍યું હતું કે પિતા બાળકોને ભરણપોષણની અગાઉ સંમત રકમ ચૂકવવામાં નિષ્‍ફળ રહ્યા હતા