​વિક્ટોરિયા:વડાપ્રધાન નરેન્દ્ર મોદીએ તેમની ત્રણ દિવસીય સેશેલ્સની ઐતિહાસિક મુલાકાત દરમિયાન દેશની નેશનલ એસેમ્બલીને સંબોધતા ભારત અને સેશેલ્સ વચ્ચેના સદીઓ જૂના અને અતૂટ સંબંધોને નવી ઊંચાઈઓ પર પહોંચાડવાનો નિર્ધાર વ્યક્ત કર્યો હતો. સેશેલ્સની સંસદને સંબોધનારા તેઓ પ્રથમ ભારતીય વડાપ્રધાન બન્યા છે. આ પ્રસંગે તેમણે સેશેલ્સના નાગરિકોના ઉષ્માભર્યા સ્વાગત અને આતિથ્ય સત્કાર બદલ આભાર વ્યક્ત કરતા કહ્યું હતું કે, ભારત અને સેશેલ્સ વચ્ચેના સંબંધો માત્ર સરકારો દ્વારા નહીં, પરંતુ બંને દેશોના લોકો દ્વારા બનાવવામાં આવ્યા છે.

​વડાપ્રધાન મોદીએ તેમના સંબોધનમાં ભારપૂર્વક જણાવ્યું હતું કે, "હિન્દ મહાસાગર ભારત અને સેશેલ્સને અલગ કરતું નથી, પરંતુ તે આપણને એકબીજા સાથે જોડે છે." તેમણે બંને દેશો વચ્ચેના ગાઢ સાંસ્કૃતિક અને ઐતિહાસિક જોડાણને યાદ કરતા જણાવ્યું કે, સેશેલ્સના લોકોની વિવિધતામાં એકતા અને તેમની સંસ્કૃતિમાં જોવા મળતા ભારતીય અંશો – પછી તે ગરબા હોય કે સમોસા અને ચટણી – તે બંને દેશો વચ્ચેની આત્મીયતાનું પ્રતીક છે.

​આબોહવા પરિવર્તન અને સુરક્ષા પર વિશેષ ભાર

વડાપ્રધાન મોદીએ વૈશ્વિક સ્તરે આબોહવા પરિવર્તનના ખતરા વિશે ચિંતા વ્યક્ત કરતા કહ્યું કે, તેનો સૌથી મોટો માર ગ્લોબલ સાઉથ અને ખાસ કરીને ટાપુ ધરાવતા દેશો પર પડી રહ્યો છે. તેમણે આંતરરાષ્ટ્રીય સમુદાયને અપીલ કરી હતી કે આબોહવા પરિવર્તનની લડાઈમાં ન્યાય અને જવાબદારી હોવી જોઈએ. દરિયાઈ સુરક્ષાના મુદ્દે તેમણે સ્પષ્ટ કર્યું કે ભારત અને સેશેલ્સની સુરક્ષા એકબીજા સાથે જોડાયેલી છે. બંને દેશો વચ્ચે દરિયાઈ સુરક્ષા, બ્લુ ઇકોનોમી, સ્પેસ ટેકનોલોજી અને ડિઝિટલ પેમેન્ટ (UPI) જેવી બાબતોમાં સહયોગ વધારવા પર ભાર મૂકવામાં આવ્યો છે.

​આ મુલાકાત દરમિયાન વડાપ્રધાને ભારત દ્વારા નિર્મિત ફાસ્ટ પેટ્રોલ વેસલ 'લેસ્પવાર' (Lespwar) સેશેલ્સ કોસ્ટ ગાર્ડને સોંપ્યું હતું. આ ઉપરાંત, આરોગ્ય ક્ષેત્રે 'જન ઔષધિ' પહેલ અંતર્ગત સમજૂતી કરાર (MoU) પણ કરવામાં આવ્યા છે, જે સેશેલ્સના નાગરિકોને સસ્તી અને ગુણવત્તાયુક્ત દવાઓ ઉપલબ્ધ કરાવવામાં મદદરૂપ થશે. ભારત દ્વારા સેશેલ્સને 175 મિલિયન ડોલરનું વિશેષ આર્થિક પેકેજ પણ જાહેર કરવામાં આવ્યું છે, જે બંને દેશો વચ્ચેના મજબૂત વિકાસલક્ષી ભાગીદારીનું પરિણામ છે.

​વડાપ્રધાન મોદીએ સેશેલ્સના સ્વતંત્રતા દિવસની ગોલ્ડન જ્યુબિલી (સુવર્ણ જયંતી) ઉજવણીમાં ગિસ્ટ ઓફ ઓનર તરીકે હાજરી આપીને બંને દેશો વચ્ચેના વ્યૂહાત્મક સંબંધોને વધુ મજબૂત બનાવવાની પ્રતિબદ્ધતા દોહરાવી હતી.