બગદાદ, તા.૩૦: મધ્ય પૂર્વના યુદ્ધગ્રસ્ત દેશ ઈરાકમાંથી અમેરિકી સૈન્યની સંપૂર્ણ વાપસી સાથે આશરે ૧૨ વર્ષ લાંબા લશ્કરી અભિયાનનો સત્તાવાર અંત આવી ગયો છે. ઇસ્લામિક સ્ટેટ (ISIS) નામના આતંકવાદી સંગઠનને નાથવા અને પ્રદેશમાં શાંતિ સ્થાપવા માટે ૨૦૧૪માં ઈરાકની ધરતી પર પગ મૂકનારા તમામ અમેરિકી સૈનિકો અને તેમના સાથી દળોએ ૩૦ સપ્ટેમ્બર સુધીમાં વાપસી પૂર્ણ કરી લીધી છે. ૨૦૦૩માં ઇરાક પર આક્રમણ કર્યા બાદ આ બીજી વાર બન્યું છે જ્યારે અમેરિકાએ ઇરાકમાંથી સૈન્ય સમેટવું પડ્યું છે.

બાઈડેન પ્રશાસનનો કરાર, ટ્રમ્પ વહીવટીતંત્રે અમલી બનાવ્યો

૨૦૨૪માં બાઈડેન વહીવટીતંત્ર દ્વારા ઈરાકની સત્તાવાર સરકાર સાથે આ વાપસી અંગે વાટાઘાટો હાથ ધરવામાં આવી હતી અને સૈનિકો પરત ખેંચવા માટે ૩૦ સપ્ટેમ્બરની આખરી સમયમર્યાદા નક્કી કરાઈ હતી. તાજેતરમાં સત્તા પર આવેલા ટ્રમ્પ વહીવટીતંત્રે પણ આ જ સમયરેખા જાળવી રાખીને સેનાને પરત બોલાવી લીધી છે. ઈરાકમાંથી બહાર નીકળેલા આશરે ૧,૫૦૦ જેટલા બાકીના અમેરિકી દળોને પાડોશી દેશ જોર્ડનમાં ખસેડવામાં આવ્યા છે, જ્યાંથી આતંકવાદ વિરોધી ગઠબંધન પોતાની બાકીની પ્રવૃત્તિઓનું સંચાલન કરશે.

ઈરાકમાં ISIS અને અમેરિકી સેનાની હાજરીનો ઈતિહાસ

ઉલ્લેખનીય છે કે ૨૦૦૩થી શરૂ થયેલા ૮ વર્ષના આક્રમણ બાદ ૨૦૧૧માં અમેરિકી સેનાએ પ્રથમ વખત ઈરાક છોડ્યું હતું. પરંતુ ૨૦૧૪માં જ્યારે આતંકવાદી જૂથ ISIS એ ઈરાક અને સીરિયાના વિશાળ ભાગો પર કબ્જો જમાવી બગદાદ સુધી પહોંચવાની ધમકી આપી, ત્યારે અમેરિકાએ ફરી ઈરાકમાં પ્રવેશ કરવો પડ્યો હતો. ૨૦૧૯માં ISIS નો સૈન્ય રીતે સફાયો થયા છતાં, આતંકવાદીઓ ફરી માથું ન ઊંચકે તે માટે અમેરિકી સેના અત્યાર સુધી ત્યાં તૈનાત રહી હતી.

ઈરાક મનાવશે ‘સાર્વભૌમત્વ દિવસ’ ની ઉજવણી

અમેરિકી સેનાની વિદાયને ઈરાકે એક ઐતિહાસિક સિદ્ધિ ગણાવી છે. ઈરાકના વડાપ્રધાન અલી અલ-ઝૈદીએ જાહેરાત કરી છે કે દેશમાં અમેરિકી લશ્કરી હાજરીના અંતને ચાર "સાર્વભૌમત્વ દિવસો" (Sovereignty Days) તરીકે ઉજવવામાં આવશે અને સમગ્ર દેશમાં રાષ્ટ્રીય રજા રહેશે. તેમણે સ્પષ્ટ કર્યું હતું કે હવે ઈરાક દેશની અંદર સશસ્ત્ર જૂથોનું નિઃશસ્ત્રીકરણ કરીને રાજ્યની સંપૂર્ણ સત્તા સ્થાપિત કરવા તરફ આગળ વધશે.