બેંગલુરુ:  કર્ણાટકના રાજકારણમાં આખરે એક મોટા અને ઐતિહાસિક પરિવર્તનનો અધ્યાય શરૂ થયો છે. અત્યાર સુધી નાયબ મુખ્યમંત્રી તરીકે પક્ષના સંકટમોચન બનેલા વરિષ્ઠ કોંગ્રેસ નેતા ડી.કે. શિવકુમારે બુધવારે કર્ણાટકના ૨૫મા મુખ્યમંત્રી તરીકે સત્તાવાર રીતે શપથ ગ્રહણ કરી લીધા છે. બેંગલુરુમાં યોજાયેલા આ ભવ્ય સમારોહમાં શિવકુમારનો અંદાજ તદ્દન અનોખો અને આધ્યાત્મિક આસ્થાથી ભરેલો જોવા મળ્યો હતો. તેઓ મંચ પર ખુલ્લા પગે, હાથમાં ભારતીય બંધારણની પવિત્ર નકલ પકડીને શપથ લેવા પહોંચ્યા હતા. શપથ ગ્રહણ પૂર્વે તેમણે દેવી સરસ્વતીની તસવીરને પુષ્પાંજલિ અર્પણ કરી દેશના લોકશાહી માળખા પ્રત્યે પોતાની અતૂટ શ્રદ્ધા વ્યક્ત કરી હતી.

આ હાઈ-પ્રોફાઈલ સમારોહમાં રાજ્યપાલ થાવરચંદ ગેહલોતે ડી.કે. શિવકુમારને પદ અને ગુપ્તતાના શપથ લેવડાવ્યા હતા. શિવકુમાર બાદ કોંગ્રેસના વરિષ્ઠ નેતા જી. પરમેશ્વરે નાયબ મુખ્યમંત્રી તરીકે શપથ લીધા હતા. આ ઐતિહાસિક ક્ષણના સાક્ષી બનવા માટે કોંગ્રેસ અધ્યક્ષ મલ્લિકાર્જુન ખડગે, રાહુલ ગાંધી સહિત હિમાચલ પ્રદેશના સીએમ સુખવિંદર સિંહ સુખુ, તેલંગાણાના સીએમ રેવંત રેડ્ડી અને કેરળના નેતા વી.ડી. સતીસન જેવા દિગ્ગજો ખાસ ઉપસ્થિત રહ્યા હતા. શપથ લેતા પહેલા શિવકુમારે સ્ટેજ પર હાજર તમામ નેતાઓનું ગુલદસ્તો આપીને ઉષ્માભર્યું સ્વાગત કર્યું હતું, જે રાજકીય વર્તુળોમાં ભારે ચર્ચાનો વિષય બન્યું છે.

રાજકીય દ્રષ્ટિએ સૌથી રસપ્રદ દ્રશ્યો ત્યારે સર્જાયા જ્યારે ડી.કે. શિવકુમારે પૂર્વ મુખ્યમંત્રી સિદ્ધારમૈયા પાસે જઈને તેમનું પુષ્પગુચ્છ અને પરંપરાગત પાઘડી પહેરાવીને સન્માન કર્યું હતું. કર્ણાટકમાં સત્તાના નેતૃત્વને લઈને આ બંને નેતાઓ વચ્ચે લાંબા સમયથી ઉગ્ર ગજગ્રાહ ચાલતો હતો, જેનો અંત ૨૮ મેના રોજ હાઈકમાન્ડની સમજાવટ બાદ સિદ્ધારમૈયાના રાજીનામા સાથે આવ્યો હતો. જો કે, સમારોહમાં બંને નેતાઓએ એકબીજા સાથે હસીને મુલાકાત કરી તમામ અટકળો પર વિરામ મૂકી દીધો હતો. આઠ વખત ધારાસભ્ય રહી ચૂકેલા ડી.કે. શિવકુમાર માટે આ શપથ વિધિ તેમના વર્ષો જૂના રાજકીય સ્વપ્નની પૂર્તિ સમાન છે, જે દક્ષિણ ભારતમાં કોંગ્રેસ માટે એક નવા યુગની શરૂઆત માનવામાં આવે છે.