નુવાકોટ : નેપાળની ત્રિશૂલી ખીણમાં જળહોનારત વચ્ચે ત્રિભુવન ત્રિશૂલી માધ્યમિક શાળાના આચાર્ય રાજેન્દ્ર દવાડીની સમયસૂચકતા હજારો બાળકો માટે જીવનરક્ષક બની. બુધવારે સવારે આશરે ૯.૨૦ વાગ્યે ઉપરવાસના બેત્રાવતી વિસ્તારમાંથી મિત્રનો ફોન આવ્યો કે પ્રચંડ પૂર નીચે તરફ ધસી રહ્યું છે. દવાડીએ તરત શાળાનો ઘંટ વગડાવી વર્ગો બંધ કરાવ્યા અને વિદ્યાર્થીઓને ઊંચી જગ્યાએ ખસેડવાનું શરૂ કર્યું. તે સમયે આશરે ૯૦૦ વિદ્યાર્થીઓ શાળા અને હોસ્ટેલ વિસ્તારમાં હતા, જ્યારે ૭૦૦થી વધુ બાળકો બસ કે પગપાળા શાળાએ આવી રહ્યા હતા. દવાડીએ બસચાલકોને સંપર્ક કરી પાછા ફરવા કહ્યું. અહેવાલો મુજબ શાળાના કુલ ૧,૬૪૩ વિદ્યાર્થીઓને જોખમમાંથી દૂર રાખવામાં આ ઝડપી નિર્ણય નિર્ણાયક બન્યો. થોડા જ સમયમાં કાદવ, પાણી અને કાટમાળનો પ્રવાહ ત્રિમાળી શાળા સુધી પહોંચી ગયો અને ઈમારત વહેતી થઈ. દવાડીએ કહ્યું કે નિર્ણય દસ મિનિટ મોડો પડ્યો હોત તો સ્થિતિ ભયાનક બની શકતી હતી. આ આપદામાં નેપાળમાં ઓછામાં ઓછી ૬૯ શાળાઓ નષ્ટ અથવા ગંભીર રીતે ક્ષતિગ્રસ્ત થઈ અને આશરે ૧૯,૦૦૦ બાળકોના અભ્યાસને અસર પહોંચી