બેંગલુરુ : કર્ણાટક પબ્લિક સર્વિસ કમિશન (KPSC) ના ભૂતપૂર્વ અધ્યક્ષ શિવ શંકરપ્પા એસ. સાહુકરની પુત્રી સાથે જોડાયેલા એક કૌભાંડ જેવા કેસમાં કર્ણાટક હાઈકોર્ટની અત્યંત આકરી મૌખિક ટિપ્પણીનો વિડીયો સોશિયલ મીડિયા પર વાયરલ થતાં ભારે ચર્ચા જાગી છે. ઉદ્યોગ અને વાણિજ્ય વિભાગમાં જુનિયર એન્જિનિયર (સિવિલ) ની પોસ્ટ માટે કેટેગરી 3B હેઠળ અનામતનો લાભ લેવા માટે ભૂતપૂર્વ KPSC ચેરમેનની પુત્રી સુમા સાહુકરે પોતાના પરિવારની વાર્ષિક આવક માત્ર ₹40,000 દર્શાવતું બોગસ પ્રમાણપત્ર રજૂ કર્યું હતું. આ મામલે સુનાવણી કરતી વખતે જસ્ટિસ એમ. નાગપ્રસન્નાએ કડક વલણ અપનાવતા સવાલોનો મારો ચલાવ્યો હતો.

તપાસ અનુસાર, સુમાના પિતા KPSC ચેરમેન તરીકે દર મહિને ₹2.25 લાખથી વધુનો પગાર મેળવતા હતા, છતાં પુત્રીએ આટલી ઓછી આવક દર્શાવીને અનામત મેળવવાનો પ્રયાસ કર્યો હતો. એફઆઈઆર રદ કરવાની સુમાની અરજી પર સુનાવણી કરતી વખતે જસ્ટિસ નાગપ્રસન્નાએ આક્રોશ વ્યક્ત કરતા કહ્યું કે આવી ખોટી માહિતી અને છેતરપિંડીને કારણે કોઈ ખરેખર ગરીબ અને લાયક ઉમેદવાર પોતાનો હક ગુમાવી બેસે છે. અદાલતે અરજદારની આ બાલિશ દલીલને પણ ફગાવી દીધી હતી કે માત્ર તેની વ્યક્તિગત આવક જ ધ્યાનમાં લેવાઈ હતી, પરિવારની નહીં.

કોર્ટની આકરી વાણી: "જ્યાં સ્પષ્ટપણે છેતરપિંડી અને ખોટા કાગળોનો ઉપયોગ દેખાઈ રહ્યો હોય, ત્યાં કોઈ પણ અતિ-તકનીકી દલીલો ચાલી શકે નહીં. આવા બોગસ દાવાઓ કરીને અનામતનો લાભ લેવો એ સીધો ગુનો છે." - જસ્ટિસ એમ. નાગપ્રસન્ના.

હાઈકોર્ટના આ આક્રમક અને કડક વલણને જોઈને સુમા વતી હાજર રહેલા વરિષ્ઠ વકીલે પોતાની એફઆઈઆર રદ કરવાની અરજી પરત ખેંચી લીધી હતી. સુમા સામે ભારતીય ન્યાય સંહિતાની છેતરપિંડી અને નકલી દસ્તાવેજો બનાવવાની ગંભીર કલમો હેઠળ ગુનો નોંધાયેલો છે. સોશિયલ મીડિયા પર હાઈકોર્ટના જજના આ નિર્ભય અને તટસ્થ અભિગમના લોકો ભારે વખાણ કરી રહ્યા છે અને લાયક ઉમેદવારો માટે ન્યાયની આશા વ્યક્ત કરી રહ્યા છે.