વોશિંગ્ટન : અમેરિકાના વોશિંગ્ટન અને ઈરાનના તેહરાન વચ્ચે હાલમાં ચાલી રહેલી રાજદ્વારી મંત્રણાઓ અને સંભવિત કરાર પર આખી દુનિયાની નજર મંડાયેલી છે. આ કરાર થવાથી મધ્ય પૂર્વના દેશોના રાજકારણમાં મોટા ફેરફારો આવી શકે છે. ખાસ કરીને આ સમજૂતી બાદ ઈરાનના શક્તિશાળી લશ્કરી સંગઠન ઈસ્લામિક રિવોલ્યુશનરી ગાર્ડ કોર્પ્સ (આઈઆરજીસી) નો ઉદય વધુ મજબૂત રીતે થઈ શકે છે.

જો અમેરિકા અને ઈરાન વચ્ચે કોઈ નક્કર ડીલ ફાઈનલ થશે તો તેના સીધા આર્થિક ફાયદા ઈરાનને મળશે. મીડિયા અહેવાલો મુજબ આ કરાર થકી આશરે ૩૦૦ અબજ ડોલરની નવી આર્થિક તકો ઊભી થઈ શકે છે. ઈરાન પર લાગેલા કડક પ્રતિબંધો હળવા થવાથી દેશની આર્થિક સ્થિતિમાં જે સુધારો થશે તેનો મોટો ફાયદો રિવોલ્યુશનરી ગાર્ડ્સને થવાની શક્યતા છે.

આ કરાર અંતર્ગત ઈરાનને ઓઈલ એક્સપોર્ટ માટે ખાસ છૂટછાટો મળી શકે છે. આ ઉપરાંત દેશના વિકાસ અને પુનર્નિમાણ માટે અબજો ડોલરના ફંડ્સ પણ ઉપલબ્ધ થઈ શકે છે. આ બધી નાણાકીય સહાય આખરે આઈઆરજીસીના હાથ મજબૂત કરશે કારણ કે ઈરાનના અર્થતંત્રના મોટા ભાગ પર પ્રત્યક્ષ કે પરોક્ષ રીતે આ સંગઠનનું વર્ચસ્વ છે.

નવા વ્યાપારી સંબંધો અને વિદેશી મૂડીરોકાણ વધવાથી રિવોલ્યુશનરી ગાર્ડ્સનો પ્રભાવ માત્ર દેશ પૂરતો સીમિત ન રહેતા આંતરરાષ્ટ્રીય સ્તરે પણ વધશે. આર્થિક રીતે સદ્ધર થવાથી તેઓ પોતાની લશ્કરી તાકાતમાં પણ નોંધપાત્ર વધારો કરી શકશે. આ બાબત પશ્ચિમી દેશોના હિતો માટે નવો પડકાર ઉભો કરી શકે છે.

આ સમગ્ર પરિદ્રશ્યને કારણે વૈશ્વિક રોકાણકારો અને પશ્ચિમી સરકારોની ચિંતામાં મોટો વધારો થયો છે. તેઓ માની રહ્યા છે કે ઈરાનની આ લશ્કરી પાંખ વધુ પાવરફુલ બનશે તો મધ્ય પૂર્વમાં ભવિષ્યમાં અશાંતિ અને તણાવ વધુ ઘેરા બની શકે છે.