ગુવાહાટી : આસામમાં ચોમાસાના કારણે આવેલું વિનાશક પૂર હજુ પણ લાખો લોકો માટે મુશ્કેલીઓ સર્જી રહ્યું છે. આવી વિકટ પરિસ્થિતિ વચ્ચે શિવસાગર જિલ્લામાંથી માનવતા અને અદમ્ય સાહસનું એક અદ્ભુત ઉદાહરણ સામે આવ્યું છે. સ્થાનિક જાંબાઝ યુવાનોના એક જૂથે ધસમસતા પૂરના પાણીમાં ઉતરીને પોતાના જીવની ચિંતા કર્યા વિના 1,000 થી વધુ ફસાયેલા લોકોને સુરક્ષિત સ્થળે પહોંચાડીને મોટો જીવતદાન આપ્યો છે.
પૂરના કારણે ગામડાઓ અને રસ્તાઓ જળમગ્ન થઈ ગયા હતા, જેના કારણે વૃદ્ધો, મહિલાઓ અને બાળકો ઘરોમાં અટવાઈ ગયા હતા. વહીવટીતંત્રની ટીમ પહોંચે તે પહેલાં જ આ સ્થાનિક યુવાનોએ પોતાની રીતે હોડીઓ, દોરડાં અને સ્થાનિક સાધનોની મદદથી રેસ્ક્યૂ કામગીરી શરૂ કરી દીધી હતી. વિડિયોમાં જોઈ શકાય છે કે છાતીસમા પાણી અને ઝડપી પ્રવાહ હોવા છતાં યુવાનોએ પીડિતોને પોતાના ખભા પર બેસાડીને સલામત સ્થળે પહોંચાડ્યા હતા.
સોશિયલ મીડિયા પર આ દિલધડક બચાવ કામગીરીનો વિડિયો વાયરલ થતાં જ દેશભરમાંથી લોકો આ યુવાનોની હિંમત, કરુણા અને નિઃસ્વાર્થ સેવાની મુક્ત મને પ્રશંસા કરી રહ્યા છે. કટોકટીના આ સમયમાં આ યુવાનોની ત્વરિત કામગીરી અને માનવતાએ સાબિત કર્યું છે કે જ્યારે મુશ્કેલીનો પહાડ તૂટી પડે, ત્યારે એકતા અને હિંમત જ સૌથી મોટો સહારો બને છે.