આરા : દાનાપુર રેલ્વે ડિવિઝન હેઠળના બિહારના આરા જંકશન પર રવિવારે વહેલી સવારે ૪:૧૦ વાગ્યાની આસપાસ ન્યુ જલપાઇગુડી-કટિહારથી નવી દિલ્હી જતી મહાનંદા એક્સપ્રેસના એન્જિનને અડીને આવેલા બે જનરલ કોચ પશ્ચિમ ક્રોસિંગ નજીક અચાનક પાટા પરથી નીચે ઉતરી જતા મુસાફરોમાં ભારે ગભરાટ અને અફરાતફરી મચી ગઈ હતી.

આ અકસ્માતના કારણે દેશના અત્યંત વ્યસ્ત ગણાતા દિલ્હી-હાવડા મુખ્ય રેલ માર્ગ પર ટ્રેન વ્યવહાર સંપૂર્ણપણે ખોરવાઈ ગયો હતો, જેના પગલે રેલવે વહીવટીતંત્રમાં દોડધામ મચી ગઈ હતી અને દાનાપુર કંટ્રોલ સ્ટેશનથી તુરંત જ એક વિશેષ ટેકનિકલ ટીમ તથા અધિકારીઓ ઘટનાસ્થળે દોડી આવ્યા હતા.

રેલવેના સત્તાવાર સૂત્રો અને અધિકારીઓના જણાવ્યા અનુસાર, સ્ટેશનના ૫૯૩ કિલોમીટર ૯A પિલર પાસે બનેલી આ ઘટના બાદ તરત જ બચાવ અને તકનીકી કામગીરી શરૂ કરવામાં આવી હતી જેથી પાટા પરથી ઉતરી ગયેલા કોચને દૂર કરીને ફસાયેલા મુસાફરોને સુરક્ષિત રાખી શકાય અને અન્ય રૂટની ટ્રેનોનું સંચાલન વ્યવસ્થિત કરી શકાય.

હજુ સુધી આ અકસ્માત સર્જાવા પાછળનું ચોક્કસ ટેકનિકલ કારણ સ્પષ્ટ થયું નથી, પરંતુ રેલ્વે તંત્ર દ્વારા ઉચ્ચસ્તરીય તપાસના આદેશ આપવામાં આવ્યા છે અને ટ્રેકનું સમારકામ તથા ડબ્બા ખસેડવાની કામગીરી પૂર્ણ થયા બાદ ટ્રેન વ્યવહાર ઝડપથી પૂર્વવત થવાની સંભાવના વ્યક્ત કરવામાં આવી રહી છે.