નવી દિલ્હી, તા.૧૯: વૈશ્વિક અર્થવ્યવસ્થામાં ચાલી રહેલી ભારે અનિશ્ચિતતાઓ અને પડકારો વચ્ચે પણ ભારતનો વિકાસ રથ રોકેટ ગતિએ આગળ વધી રહ્યો છે. દેશના વેપાર અને વાણિજ્ય ક્ષેત્રને વૈશ્વિક ફલક પર નવી ઊંચાઈએ લઈ જવા માટે કેન્દ્ર સરકારે આ વર્ષે ૧ ટ્રિલિયન (એક લાખ કરોડ) ડોલરની નિકાસ (Exports) નો અત્યંત મહત્વાકાંક્ષી લક્ષ્યાંક રાખ્યો છે. કેન્દ્રીય વાણિજ્ય અને ઉદ્યોગ મંત્રી પિયુષ ગોયલે નવી દિલ્હીમાં આયોજિત એક ભવ્ય સમારોહમાં આ મોટી જાહેરાત કરી છે. તેમણે ઉમેર્યું કે, આ વર્ષે ૧ ટ્રિલિયન ડોલર અને આગામી પાંચ વર્ષમાં ૨ ટ્રિલિયન ડોલરની નિકાસ હાંસલ કરવાનું ભારતનું સપનું છે, જે 'આત્મનિર્ભર ભારત'ની સાચી ઓળખ બનશે.

નવી દિલ્હીમાં આયોજિત 'ભારત વ્યાપાર મહોત્સવ'ના સત્તાવાર વેબસાઇટ લોન્ચિંગ સમારોહને સંબોધતા કેન્દ્રીય મંત્રી પિયુષ ગોયલે ભારતીય ઉદ્યોગ સાહસિકોના ભારોભાર વખાણ કર્યા હતા. તેમણે ગર્વભેર જણાવ્યું કે, વૈશ્વિક સ્તરે ચાલી રહેલી મંદીના માહોલ છતાં ભારતની કુલ નિકાસ રેકોર્ડબ્રેક ૮૬૩ અબજ (બિલિયન) ડોલર સુધી પહોંચી ગઈ છે, જે પાછલા વર્ષની સરખામણીએ આશરે પાંચ ટકાનો ભવ્ય વધારો દર્શાવે છે. સૌથી મહત્વની વાત એ છે કે આ વખતે મેન્યુફેક્ચરિંગ (માલ-સામાન) અને સર્વિસ (સેવાઓ) બંને ક્ષેત્રોની નિકાસમાં એકસાથે જોરદાર ઉછાળો નોંધાયો છે, જે વર્તમાન વૈશ્વિક વાતાવરણમાં કોઈ ચમત્કારથી કમ નથી.

'વિકસિત ભારત ૨૦૨૭'ના લક્ષ્યને રોકવાની કોઈનામાં તાકાત નથી

વાણિજ્ય મંત્રીએ દેશના વેપારી આલમને પ્રોત્સાહિત કરતા જણાવ્યું કે, આગળ વધવાનો આપણો ઉત્સાહ અને જુસ્સો ક્યારેય ઓછો ન થવો જોઈએ. આપણે સૌએ દેશહિતમાં અથાક મહેનત ચાલુ રાખવાની છે. તેમણે દ્રઢ વિશ્વાસ વ્યક્ત કર્યો હતો કે, "ભારતના ઉદ્યોગો, વેપાર સમુદાય અને સામાન્ય નાગરિકોમાં 'વિકસિત ભારત ૨૦૪૭' ના મહાન લક્ષ્યને પ્રાપ્ત કરવાનો જુસ્સો એટલો બધો મજબૂત છે કે હવે દુનિયાની કોઈ પણ તાકાત ભારતની આ પ્રગતિને રોકી શકશે નહીં." ભારતનું અર્થતંત્ર આજે વિશ્વમાં સૌથી ઝડપથી વિકસતું અર્થતંત્ર છે.

સ્વદેશી વ્યાપારને વૈશ્વિક વેગ આપશે 'ભારત વ્યાપાર મહોત્સવ'

પિયુષ ગોયલે સ્પષ્ટ કર્યું હતું કે 'ભારત વ્યાપાર મહોત્સવ' પાછળનો મુખ્ય હેતુ દેશના સ્વદેશી વાણિજ્ય અને લોકલ બ્રાન્ડ્સને પ્રોત્સાહન આપવાનો છે. આ મહોત્સવ એ સુનિશ્ચિત કરશે કે ભારતીય ઉત્પાદનો અને સેવાઓ દેશના ખૂણે-ખૂણે પહોંચવાની સાથે વૈશ્વિક બજારો પર પણ પોતાનો દબદબો બનાવે. આ ભવ્ય મહોત્સવ આગામી ૧૨ થી ૧૫ ઓગસ્ટ દરમિયાન નવી દિલ્હીમાં યોજાશે. કેન્દ્રીય વાણિજ્ય અને ઉદ્યોગ મંત્રાલયના સીધા માર્ગદર્શન હેઠળ 'કન્ફેડરેશન ઓફ ઓલ ઇન્ડિયા ટ્રેડર્સ' (CAIT) અને 'ઈન્ડિયા ટ્રેડ પ્રમોશન ઓર્ગેનાઈઝેશન' (ITPO) દ્વારા સંયુક્ત રીતે આ ઐતિહાસિક વેપારી મેળાનું આયોજન કરવામાં આવી રહ્યું છે.