અમદાવાદ :દેશના ઉત્તર અને પૂર્વ મધ્ય ભારતમાં છેલ્લા કેટલાક સમયથી અતિભારે વરસાદ અને ભીષણ પૂરનો કહેર જોવા મળી રહ્યો છે. આ વિસ્તારોમાં વરસાદના કારણે સર્જાયેલી વિનાશકારી પરિસ્થિતિમાં માનવ સર્જિત અને કુદરતી આફતોનો સામનો કરવામાં સંસાધનો ઓછા પડી રહ્યા છે. ત્યારે, ગુજરાત રાજ્ય માટે પણ આગામી સમયમાં એક ગંભીર હવામાન પરિસ્થિતિ ઊભી થવાની શક્યતા છે. બંગાળની ખાડીમાં સર્જાયેલી એક અત્યંત મજબૂત વરસાદી સિસ્ટમ ગુજરાત તરફ આગળ વધી રહી છે, જેને પગલે રાજ્યમાં ભારેથી અતિભારે વરસાદની આગાહી કરવામાં આવી છે.

આ વરસાદી સિસ્ટમનો પ્રારંભ બંગાળની ખાડીમાં થયો છે, જ્યાં તે સક્રિય બનીને પશ્ચિમ તરફ આગળ વધી રહી છે. હવામાનશાસ્ત્રીઓ અને નિષ્ણાતો દ્વારા આ સિસ્ટમના રૂટનું વિગતવાર વિશ્લેષણ કરવામાં આવ્યું છે. 

આ માર્ગ દ્વારા સિસ્ટમ ગુજરાત સુધી પહોંચતા ઘણા રાજ્યોમાં તેની અસર જોવા મળશે. ગુજરાતમાં આ સિસ્ટમના કારણે આગામી 24 કલાક પછી સ્થિતિ બેકાબૂ પણ બની શકે તેવી સંભાવના વ્યક્ત કરવામાં આવી છે. હવામાન વિભાગ દ્વારા રાજ્યમાં હેવી ટુ હેવી રેઈનફોલ એટલે કે ભારેથી અતિભારે વરસાદની આગાહી કરવામાં આવી છે. આ ઉપરાંત, કેટલાક ચોક્કસ વિસ્તારો અને તાલુકાઓમાં મેઘગર્જના સાથે વાદળો ફાટવા જેવી ગંભીર ઘટનાઓની પણ પૂરી શક્યતાઓ સેવાઈ રહી છે.