​ટોક્યો,: ​ઉગતા સૂરજના દેશ તરીકે ઓળખાતા જાપાનની ધરતી પર ફરી એકવાર કુદરતનો પ્રકોપ જોવા મળ્યો છે. પૂર્વ જાપાનના વિશાળ વિસ્તાર અને રાજધાની ટોક્યોને આવરી લેતા પ્રદેશોમાં વહેલી સવારે ભૂકંપનો જોરદાર આંચકો અનુભવાયો હતો. પૃથ્વીના પેટાળમાં ૭૦ કિલોમીટરની ઊંડાઈએથી ઉદ્ભવેલા આ ધ્રુજારાને કારણે ઈબારાકી પ્રાંત સહિત આસપાસના વિસ્તારોમાં ભારે અફરાતફરી સર્જાઈ હતી. પંચાવનથી સાઠ જેટલી ક્ષમતા ધરાવતા આ ભૂકંપની તીવ્રતા રિક્ટર સ્કેલ પર ૫.૯ નોંધવામાં આવી છે. ઉંઘતા લોકોને અચાનક ધરતી ધ્રૂજવાનો અહેસાસ થતાં જ ઘરની બહાર દોડી આવવાની ફરજ પડી હતી.

​આ ભૂકંપના આંચકાને કારણે ટોક્યોના પૂર્વ વિસ્તાર કોટો વર્ડમાં જમીનની અંદરથી પસાર થતી મુખ્ય પાણીની પાઈપલાઈન ધડાકાભેર ફાટી ગઈ હતી, જેના લીધે હજારો ગેલન પાણી રસ્તાઓ પર રેલાઈ ગયું હતું અને વાહનવ્યવહારને માઠો ફટકો પડ્યો હતો. આ દુર્ઘટના અને ભૂકંપના ધ્રુજારા દરમિયાન ઘરમાંથી ભાગદોડ મચતા કે વસ્તુઓ ઉપર પડવાના કારણે ૨૩ થી વધુ નાગરિકોને નાની-મોટી ઈજાઓ પહોંચી હોવાના સત્તાવાર અહેવાલો પ્રાપ્ત થયા છે. ઈજાગ્રસ્તોને તાત્કાલિક ધોરણે નજીકની હોસ્પિટલોમાં ખસેડવામાં આવ્યા છે.

​ભૂકંપની તીવ્રતાને પગલે જાપાન હવામાન ખાતા અને ભૂગર્ભીય સર્વેક્ષણ સંસ્થાઓએ તુરંત જ ઈમરજન્સી એલર્ટ જાહેર કર્યું હતું. જોકે રાહતની વાત એ રહી કે આ ભૂકંપના કારણે દરિયામાં કોઈ મોટી હલચલ જોવા મળી નથી અને ત્સુનામીની કોઈ જ શક્યતા ન હોવાનું સ્પષ્ટ કરવામાં આવ્યું છે.

​ધરતીકંપના કારણે વિમાનમથકો પર ફ્લાઈટ્સ અને રેલવેના પ્રીમિયમ તેમજ લોકલ રૂટો પર ટ્રેનોનો વ્યવહાર સુરક્ષાના કારણોસર થોડા સમય માટે રોકી દેવામાં આવ્યો હતો. જાપાનના વડાપ્રધાન કાર્યાલય દ્વારા પરિસ્થિતિ પર સતત નજર રાખવામાં આવી રહી છે અને રાહત-બચાવ ટુકડીઓને કાર્યરત કરી દેવાઈ છે. પરમાણુ ઊર્જા મથકો સુરક્ષિત હોવાનું અને ત્યાં કોઈ પણ જાતની ખામી ન સર્જાઈ હોવાની પુષ્ટિ તંત્ર દ્વારા કરવામાં આવી છે.