મુંબઈ : મુંબઈગરાંની લાઈફલાઈન ગણાતી લોકલ ટ્રેનમાં પ્રવાસીઓની સુરક્ષાને લઈને ફરી એકવાર ગંભીર અને ચોંકાવનારો કિસ્સો પ્રકાશમાં આવ્યો છે. મધ્ય રેલવે માર્ગ પર દોડતી લોકલ ટ્રેન નંબર DBL-2 ના મહિલા કોચ (લેડીઝ ડબ્બા) માં બપોરના સમયે અચાનક એક મહિલા મુસાફરની બેગમાં રાખેલી પાવર બેંક ફાટતાં ભયાનક ધડાકો થયો હતો અને જોતજોતામાં બેગમાં વિકરાળ આગ લાગી ગઈ હતી. આ અચાનક બનેલી ઘટનાથી ટ્રેનના મહિલા કોચમાં ભારે અફરાતફરી અને નાસભાગ મચી ગઈ હતી.

પ્રાપ્ત વિગતો અનુસાર, ચાલતી ટ્રેનમાં ફાટેલી પાવર બેંકના ધડાકા અને ધુમાડાના ગોટાથી મહિલા મુસાફરો ગભરાઈ ગયા હતા. પરંતુ ગભરાટ વચ્ચે પણ મહિલાઓએ અદ્ભુત સાહસ અને સમયસૂચકતા દાખવી હતી. ટ્રેનમાં સવાર મુસાફરોએ તાત્કાલિક ઈમરજન્સી અલાર્મ ચેઈન (ACP) ખેંચીને લોકલ ટ્રેનને રોકવાની કોશિશ કરી હતી. આ સાથે જ હિંમત બતાવીને સળગતી બેગને ટ્રેનની બહાર ફેંકી દેવામાં આવી હતી અને પોતાની પાસે રહેલા પીવાના પાણીનો મારો ચલાવીને આગને વધુ ફેલાતી અટકાવી ઓલવી નાખવામાં આવી હતી.

આ કટોકટીપૂર્ણ પરિસ્થિતિને પગલે લોકલ ટ્રેનને ઘાટકોપર રેલવે સ્ટેશન પાસે બપોરે ૧૨:૫૧ થી ૧૨:૫૩ વાગ્યા સુધી રોકી રાખવામાં આવી હતી. ઘટનાની જાણ થતાં જ TSRT નો સ્ટાફ તાત્કાલિક સ્થળ પર પહોંચી ગયો હતો અને અલાર્મ ચેઇન રિસેટ કરીને સ્થિતિનો તાગ મેળવ્યો હતો. સદનસીબે, મહિલા મુસાફરોની સમયસરની સતર્કતા અને સૂઝબૂઝના કારણે કોઈ જાનહાનિ થઈ નહોતી અને એક બહુ મોટી સંભવિત આસમાની દુર્ઘટના ટળી ગઈ હતી.

જોકે, ચાલતી ટ્રેનમાં ઇલેક્ટ્રોનિક ગેજેટ્સ અને પાવર બેંકમાં વિસ્ફોટ થવાની આ ઘટનાએ રેલવે મુસાફરોની સલામતી સામે મોટો પ્રશ્નાર્થ ચિહ્ન ઊભો કર્યો છે. પ્રવાસી સંગઠનો દ્વારા માંગ કરવામાં આવી રહી છે કે રેલવે પ્રશાસન દ્વારા ઈલેક્ટ્રોનિક સામગ્રીઓની ગુણવત્તા અને મુસાફરી દરમિયાન લેવાની સાવચેતીઓ અંગે પ્રવાસીઓમાં જાગૃતિ લાવવામાં આવે, જેથી ભવિષ્યમાં આવી ટેકનિકલ ખામીઓને કારણે સર્જાતા અકસ્માતોને અટકાવી શકાય.