શ્રીનગર : સોનમર્ગની મનોહર ખીણોમાંથી શ્રીનગર પરત ફરી રહેલા પ્રવાસીઓ માટે મંગળવારે એક દુ:ખદ ઘટના બની હતી. ગાંદરબલ જિલ્લાના કંગન વિસ્તારમાં ગુંડ સુંબલ પાવર હાઉસ નજીક ૧૮ પ્રવાસીઓને લઈ જતું એક ટેમ્પો ટ્રાવેલર અચાનક કાબુ ગુમાવીને ૬૦ ફૂટ ઊંડી ખીણમાં પડી ગયું હતું, જેના કારણે આખો વિસ્તાર હચમચી ગયો હતો.

આ ભયાનક અકસ્માતમાં વાહનચાલક સહિત તમામ ૧૮ લોકો ગંભીર રીતે ઘાયલ થયા છે, જેમાંથી ૬ મુસાફરોની પ્રાસંગિક સ્થિતિ અત્યંત નાજુક હોવાનું જાણવા મળ્યું છે. પ્રાપ્ત માહિતી અનુસાર, આ તમામ ઘાયલો પંજાબના ગુરદાસપુર જિલ્લાના રહેવાસી છે અને કાશ્મીરની સુંદરતા માણીને પરત ફરી રહ્યા હતા ત્યારે આ આફત આવી પડી હતી.

પ્રાપ્ત અહેવાલો મુજબ, ડીએલ૧ વીસી-૫૨૩૧ (DL1 VC-5231) નંબરનું આ ટેમ્પો ટ્રાવેલર સોનમર્ગથી શ્રીનગર તરફ પ્રવાસ કરી રહ્યું હતું. કંગન વિસ્તારમાં ગુંડ સુંબલ પાવર હાઉસ પાસે પહોંચતા જ ડ્રાઇવરે વાહન પરથી સ્ટિયરિંગનો કાબુ ગુમાવી દીધો હતો, જેથી વાહન સીધું ઊંડી ખીણમાં જઈને ખાબક્યું હતું અને મુસાફરોના જીવ તાળવે ચોંટી ગયા હતા.

ઘટનાની જાણ થતાં જ સ્થાનિક પ્રશાસન અને રાહત-બચાવ ટીમો તાત્કાલિક ઘટનાસ્થળે દોડી આવી હતી અને યુદ્ધના ધોરણે બચાવ કામગીરી શરૂ કરી તમામ ઘાયલોને નજીકની હોસ્પિટલમાં સારવાર માટે ખસેડ્યા હતા. આ માર્ગ પર અગાઉ પણ અનેક નાના-મોટા અકસ્માતો સર્જાયા હોવાથી પ્રશાસન દ્વારા આગામી દિવસોમાં આ જોખમી વળાખો પર સ્પીડ બ્રેકર્સ અને ક્રેશ બેરિયર્સ લગાવવા તેમજ પ્રવાસી વાહનોની ગતિ પર કડક નજર રાખવા માટેના સુરક્ષા પગલાં લેવામાં આવશે.