નવી દિલ્હી : વિયેતનામના ફુ ક્વોક ટાપુ નજીક એક અત્યંત હૃદયદ્રાવક બોટ દુર્ઘટના સામે આવી છે, જેમાં 15 ભારતીય પ્રવાસીઓએ પોતાના જીવ ગુમાવ્યા છે. એક મોબાઈલ કંપની દ્વારા પોતાના કર્મચારીઓ અને વિતરકો માટે આયોજિત કરાયેલી આ પ્રવાસન સફર અંતે મોતની સફર બની રહી હતી. મૃતકોમાં 13 પુરુષો અને બે મહિલાઓનો સમાવેશ થાય છે. આ ઘટનાએ સમગ્ર દેશમાં શોકની લહેર ફેલાવી દીધી છે, ખાસ કરીને જે પરિવારોએ પોતાના સ્વજન ગુમાવ્યા છે તેમના ઘરોમાં કલ્પાંત છવાઈ ગયો છે.

ખુશીના વાતાવરણમાં મધરાતે મોતનું તાંડવ

પ્રાપ્ત માહિતી અનુસાર, મોબાઈલ નિર્માણ કંપની 'લાવા' દ્વારા તેમના વેચાણ લક્ષ્ય (Sales Target) પૂર્ણ કરનાર ભાગીદારો અને કર્મચારીઓ માટે આ વિદેશ પ્રવાસનું આયોજન કરવામાં આવ્યું હતું. પ્રવાસના ગણતરીના દિવસોમાં જ આ દુર્ઘટના સર્જાતા તમામ સ્તબ્ધ છે. મૃતકોમાં તમિલનાડુના દસ, આંધ્રપ્રદેશના ત્રણ અને કેરળના એક દંપતીનો સમાવેશ થાય છે. મૃતક અલાગુરાજાના પરિવારજનોએ જણાવ્યું હતું કે, સવારે જ ફોન પર તેમની સાથે વાત થઈ હતી, પરંતુ સાંજે મોતની ખબર મળતા પરિવારજનો ભાંગી પડ્યા હતા. કોલ્લમ જિલ્લાના એ.સી. થોમસ અને તેમની પત્ની લવની થોમસના મોતથી પણ સમગ્ર વિસ્તારમાં ભારે શોકનું મોજું ફરી વળ્યું છે.

તંત્ર એલર્ટ: વડાપ્રધાન હુને તપાસના આદેશ આપ્યા

વિયેતનામના વડા પ્રધાન લે મિન્હ હુને આ સમગ્ર મામલે ગંભીર નોંધ લઈને ઉચ્ચ સ્તરીય તપાસના આદેશ આપ્યા છે. તેમણે સ્પષ્ટ શબ્દોમાં જણાવ્યું છે કે, જો આ અકસ્માત પાછળ કોઈની બેદરકારી સાબિત થશે, તો તેની સામે કાયદાકીય રીતે કડક કાર્યવાહી કરવામાં આવશે. અકસ્માત બાદ 21 લોકોને બચાવી લેવામાં આવ્યા છે, જેમને નજીકની હોસ્પિટલોમાં દાખલ કરવામાં આવ્યા છે, જેમાંથી બેની હાલત અત્યંત ગંભીર હોવાનું જાણવા મળે છે.

મૃતદેહો પરત લાવવા સરકારની કવાયત

ઘટના બાદ ભારતીય દૂતાવાસ અને સ્થાનિક વહીવટી તંત્ર વચ્ચે સંકલન સાધીને મૃતદેહોને વહેલી તકે ભારત પરત લાવવા માટે યુદ્ધના ધોરણે કામગીરી શરૂ કરવામાં આવી છે. લાવા કંપનીએ પણ દુઃખ વ્યક્ત કરતા જણાવ્યું છે કે, કંપનીની પ્રાથમિકતા અત્યારે અસરગ્રસ્ત પરિવારોને તમામ પ્રકારનો ટેકો પૂરો પાડવાની છે. વિયેતનામમાં ભારતીય દૂતાવાસે પરિવારોની મદદ માટે ખાસ કંટ્રોલ રૂમ પણ શરૂ કર્યો છે. આ દુર્ઘટનાએ ફરી એકવાર પ્રવાસન સુરક્ષાના મુદ્દે ગંભીર સવાલો ઊભા કર્યા છે, જ્યાં કુદરતી કહેર કે માનવીય ભૂલ એક ખુશહાલ પરિવારના સપનાઓ ક્ષણભરમાં રોળી શકે છે.