કુશીનગર (યુપી): ભારતીય સેના દ્વારા ગયા વર્ષે કરવામાં આવેલા 'ઓપરેશન સિંદૂર'ની પ્રથમ વર્ષગાંઠ પર ઉત્તર પ્રદેશના કુશીનગરના પરિવારોમાં આજે પણ ભારે ઉત્સાહ અને દેશભક્તિનો માહોલ જોવા મળી રહ્યો છે. ગયા વર્ષે સૈન્ય કાર્યવાહીના માનમાં પોતાની દીકરીઓના નામ 'સિંદૂર' રાખનારા પરિવારોએ આજે ફરી એકવાર રાષ્ટ્રસેવા અને દેશભક્તિ પ્રત્યે પોતાની પ્રતિબદ્ધતા વ્યક્ત કરી છે.
૭ મે, ૨૦૨૫ના રોજ ભારતે પહલગામ આતંકી હુમલાના વળતા જવાબમાં પાકિસ્તાન અને પીઓકેમાં આતંકી માળખાને નિશાન બનાવી 'ઓપરેશન સિંદૂર' શરૂ કર્યું હતું. આ હુમલામાં ૨૬ નિર્દોષ નાગરિકોએ જીવ ગુમાવ્યા હતા. ૧૦ મેના રોજ જ્યારે બંને દેશો વચ્ચે યુદ્ધવિરામ જેવી સ્થિતિ સર્જાઈ, ત્યારે કુશીનગર મેડિકલ કોલેજમાં જન્મેલી ૧૭ બાળકીઓના નામ તેમના માતા-પિતાએ સેનાના આ ઓપરેશનના માનમાં 'સિંદૂર' રાખ્યા હતા.
પદ્રૌના વિસ્તારના સોહરૌના રહેવાસી મદન ગુપ્તા, જેમની પૌત્રીનું નામ પ્રતિકા ઉર્ફે 'સિંદૂર' રાખવામાં આવ્યું છે, તેઓ ગર્વથી કહે છે કે, "જ્યારે પાકિસ્તાને પહલગામ હુમલો કરી આપણી બહેન-દીકરીઓનું સિંદૂર ભૂંસવાનો પ્રયાસ કર્યો, ત્યારે આપણી સેનાએ તેમને જડબાતોડ જવાબ આપ્યો હતો. અમે ઈચ્છીએ છીએ કે અમારી દીકરી ભણી-ગણીને મોટી થઈને સેનામાં એક ઉચ્ચ અધિકારી બને અને દેશની સેવા કરે." આવો જ સૂર ભેડીહારી અને જંગલ નહર છાપરા ગામના પરિવારોમાં પણ જોવા મળ્યો હતો.
આ પ્રસંગે પહલગામ હુમલામાં શહીદ થયેલા કાનપુરના શુભમ દ્વિવેદીના પત્ની ઐશાન્યાએ પણ આ ઓપરેશનને યાદ કરતા કહ્યું કે, "આ પહેલા ક્યારેય આવો બદલો લેવામાં આવ્યો ન હતો. આટલી મોટી કાર્યવાહીથી અમારા જેવા શોકગ્રસ્ત પરિવારોને સાચો ન્યાય મળ્યો છે." મેડિકલ કોલેજના પૂર્વ પ્રિન્સિપાલ ડો. આર.કે. શાહીએ જણાવ્યું હતું કે, અનેક વાલીઓ આજે પણ પોતાની દીકરીઓને લશ્કરી સેવામાં મોકલવાની ઈચ્છા ધરાવે છે. 'સિંદૂર' નામ હવે આ પરિવારો માટે માત્ર એક ઓળખ નથી, પરંતુ હિંમત અને બલિદાનનું પ્રતીક બની ગયું છે.