શ્રીનગર: જમ્મુ-કાશ્મીરમાં એક અનોખી ઘટના સામે આવી છે, જેમાં પીઓકેનો ૨૫ વર્ષીય ઝીશાન અહેમદ મીર પોતાની પ્રેમિકાને મળવા એલઓસી પાર કરીને ભારતમાં ઘૂસ્યો હતો. સેનાની ૧૨ ગ્રેનેડિયર્સ યુનિટે ઉરીના સિલિકોટ વિસ્તારમાંથી તેની ધરપકડ કરી છે અને હાલ સુરક્ષા એજન્સીઓ દ્વારા સઘન પૂછપરછ ચાલી રહી છે.

પ્રેમની કથાઓ અવારનવાર સરહદોના બંધનો તોડતી હોય છે, તેવી જ એક ઘટના જમ્મુ-કાશ્મીરમાં સામે આવી છે. પોતાની પ્રેમિકાને મળવાની તડપમાં પાકિસ્તાન અધિકૃત કાશ્મીર (પીઓકે) ના એક યુવકે ભારત-પાકિસ્તાન વચ્ચેની નિયંત્રણ રેખા (એલઓસી) જ પાર કરી લીધી છે. આ અનોખા મામલાએ સુરક્ષા એજન્સીઓને પણ ચોંકાવી દીધી છે અને હાલમાં આ યુવકના ઈરાદાઓની સઘન તપાસ ચાલી રહી છે.

પ્રાપ્ત વિગતો અનુસાર, પકડાયેલા યુવકની ઓળખ ૨૫ વર્ષીય ઝીશાન અહેમદ મીર તરીકે થઈ છે, જે પીઓકેના મુઝફ્ફરાબાદ વિસ્તારનો રહેવાસી છે. ભારતીય સેનાની ૧૨ ગ્રેનેડિયર્સ યુનિટે ઉરી સેક્ટરના સિલિકોટ વિસ્તારમાં શંકાસ્પદ હિલચાલ જોતા આ યુવકને અટકાયતમાં લીધો હતો.

પ્રાથમિક પૂછપરછમાં ઝીશાને દાવો કર્યો છે કે તે કોઈ આતંકવાદી કે જાસૂસી મિશન માટે નથી આવ્યો, પરંતુ પોતાની પ્રેમિકાને મળવા માટે જ ભારતમાં ઘૂસ્યો છે. રક્ષા સૂત્રોના જણાવ્યા અનુસાર, ઝીશાન સોશિયલ મીડિયાના માધ્યમથી કાશ્મીરની એક યુવતીના સંપર્કમાં આવ્યો હતો. છેલ્લા કેટલાક મહિનાઓથી તેમની વચ્ચે વાતચીત ચાલી રહી હતી અને ધીમે-ધીમે આ સંબંધ પ્રેમમાં બદલાઈ ગયો હતો. તે આ યુવતી સાથે લગ્ન કરવા માંગતો હતો. બંને દેશો વચ્ચેના સીમિત સંપર્ક અને તણાવપૂર્ણ સંબંધોને કારણે તેણે ગેરકાયદેસર રસ્તો અપનાવવાનું મોટું જોખમ ઉઠાવ્યું હતું.

રક્ષા અધિકારીઓના મતે ઝીશાન પાસે મુસાફરી માટેનો કોઈ પણ કાયદેસરનો દસ્તાવેજ ન હતો. જોકે તેણે આતંકી સંગઠનો સાથે કોઈ સંબંધ ન હોવાનો દાવો કર્યો છે, પરંતુ સુરક્ષા એજન્સીઓ તેની વાતની સ્વતંત્ર રીતે પુષ્ટિ કરી રહી છે. જમ્મુ-કાશ્મીર જેવા અતિ સંવેદનશીલ વિસ્તારમાં કોઈ વ્યક્તિનું આ રીતે ગેરકાયદેસર ઘૂસણખોરી કરવું એ સુરક્ષાની દ્રષ્ટિએ અત્યંત ગંભીર બાબત માનવામાં આવે છે. 

ભૂતકાળમાં આતંકવાદીઓ પણ એલઓસી મારફતે ઘૂસણખોરી કરતા રહ્યા હોવાથી, આ મામલાની ઝીણવટભરી તપાસ ફરજિયાત બની જાય છે.

સ્થાનિક લોકો અને સોશિયલ મીડિયામાં પણ આ ઘટના ભારે ચર્ચાનો વિષય બની છે, જ્યાં કેટલાક તેને પ્રેમ ખાતર ઉઠાવેલું સાહસ કહી રહ્યા છે તો કેટલાક કાયદાના ઉલ્લંઘનને અયોગ્ય ગણાવી રહ્યા છે. 

હાલમાં ઝીશાનને સંબંધિત સુરક્ષા એજન્સીઓની નજર હેઠળ કસ્ટડીમાં રાખવામાં આવ્યો છે. તેના પરિવાર, બેકગ્રાઉન્ડ અને સંપર્કોની સઘન તપાસ ચાલી રહી છે. આ ઉપરાંત, જે કાશ્મીરી યુવતી સાથે તેના સંબંધ હોવાનું કહેવાય છે તેની પણ કડક પૂછપરછ કરવામાં આવી રહી છે. સંપૂર્ણ તપાસ બાદ જ 

સ્પષ્ટ થશે કે આ માત્ર એક પાગલ પ્રેમીની લવ સ્ટોરી છે કે પછી તેની પાછળ અન્ય કોઈ ઊંડું કાવતરું છુપાયેલું છે.