ઇલેક્ટ્રિક વાહનો ભવિષ્યનું સાધન કહેવાય છે, પરંતુ જ્યારે તે જ વાહનો વારંવાર નિષ્ફળ જવા લાગે છે, ત્યારે ગ્રાહકોની ધીરજ ચોક્કસ તૂટી જાય છે. મધ્યપ્રદેશના સતના જિલ્લામાં  પણ આવો જ એક કિસ્સો પ્રકાશમાં આવ્યો છે, જ્યાં બજાજ ચેતક EV સ્કૂટરથી નારાજ એક યુવકે અનોખી રીતે પોતાનો વિરોધ નોંધાવ્યો છે. તેણે પોતાના સ્કૂટરને 'કચરાપેટી'માં ફેરવી દીધું, અને તેને બજારમાં લઈ ગયો, જેથી લોકો તેનું દુઃખ સમજી શકે. હવે આ વિરોધનો વીડિયો સોશિયલ મીડિયા પર ઝડપથી વાયરલ થઈ રહ્યો છે.

આ ઘટના સતના જિલ્લાના બિરસિંહપુર વિસ્તારમાં બની હતી. અહીં રહેતા રાહુલ પાંડેએ લગભગ 14 મહિના પહેલા લગભગ રૂ. 1.10 લાખ ખર્ચીને બજાજ ચેતક ઇલેક્ટ્રિક સ્કૂટર ખરીદ્યું હતું. રાહુલને આશા હતી કે, આ સ્કૂટર તેને પેટ્રોલના ખર્ચમાંથી બચાવશે, અને મુશ્કેલી વિના ચાલશે, પરંતુ તેનો અનુભવ શરૂઆતથી જ વિપરીત રહ્યો હતો.

રાહુલ પાંડે કહે છે કે, સ્કૂટર ખરીદ્યા પછી તરત જ તેમાં વારંવાર ખામી સર્જાવા લાગી હતી. ચાલતી વખતે સ્કૂટર અચાનક બંધ થઈ જતું હતું. તેઓ આ સમસ્યાને "વાયરસ આવવા" તરીકે વર્ણવે છે, કારણ કે, સ્કૂટર ચેતવણી આપ્યા વિના અટકી જતું હતું. ઘણી વખત પરિસ્થિતિ એવી બની કે, સ્કૂટરને ટેમ્પોમાં ભરીને એજન્સીમાં લઈ જવું પડતું હતું.

રાહુલના કહેવા મુજબ, તેણે તાજેતરમાં જ ફરી એકવાર સ્કૂટરની સર્વિસ કરાવી હતી. પરંતુ સર્વિસ સેન્ટરથી પાછા ફરતી વખતે, સ્કૂટર ફરીથી બંધ થઈ ગયું હતું. આ ઘટનાએ તેને સંપૂર્ણપણે નિરાશ કરી દીધો હતો. વારંવાર ફરિયાદ કરવા છતાં સમસ્યાનો કાયમી ઉકેલ ન મળવાથી તેનો ગુસ્સો વધી ગયો હતો.

સતત મુશ્કેલીથી કંટાળીને, રાહુલ પાંડે અને તેના નાના ભાઈ રોહિત પાંડેએ વિરોધનો એક અલગ રસ્તો પસંદ કર્યો હતો. તેઓએ સ્કૂટરને એક વાહન પર મૂક્યું, અને તેના પર મોટા અક્ષરોમાં "કચરાપેટી" લખેલું પોસ્ટર ચોંટાડ્યું હતું. આ પછી તેણે આ વાહનને બિરસિંહપુર બજારમાં ફરવાનું શરૂ કર્યું હતું.

એટલું જ નહીં, બંને ભાઈઓએ બજારમાં લોકોને આ કચરાપેટીમાં કચરો નાખવાની અપીલ કરી હતી. ઉપરાંત, તેમણે લોકોને ચેતવણી આપી હતી કે, ભૂલથી પણ આ સ્કૂટર ખરીદતા નહીં. ઘણા લોકોએ તેમના વિરોધ પ્રદર્શનને ટેકો આપતા તેમાં કચરો ફેંક્યો, જેના કારણે આ પ્રદર્શન વધુ ચર્ચામાં આવ્યું હતું.