પશ્ચિમ બંગાળમાં ભાજપની જીત અને સત્તા પરિવર્તનની હિલચાલ વચ્ચે રાજ્ય વહીવટીતંત્ર દ્વારા તમામ સરકારી રેકોર્ડ્સ અને મહત્વપૂર્ણ દસ્તાવેજોને સુરક્ષિત રાખવા માટે કવાયત હાથ ધરવામાં આવી છે. નવા આદેશ મુજબ, કોઈપણ સરકારી ફાઈલ કે દસ્તાવેજ ઓફિસની બહાર લઈ જવા પર, તેને નુકસાન પહોંચાડવા પર કે હટાવવા પર સંપૂર્ણ પ્રતિબંધ લાદી દેવામાં આવ્યો છે. આ ઉપરાંત, દસ્તાવેજોના બિનઅધિકૃત સ્કેનિંગ અથવા ફોટોકોપી કરવા પર પણ રોક લગાવાઈ છે. જો કોઈ ફાઈલ ગાયબ થશે કે તેને નુકસાન પહોંચશે, તો તેની સીધી જવાબદારી સંબંધિત અધિકારીની રહેશે તેવું સ્પષ્ટ કરવામાં આવ્યું છે, જેથી સત્તાના હસ્તાંતરણ પહેલાં પારદર્શિતા જળવાઈ રહે.