મુંબઈ: અભિનેતા ઇમરાન ખાને ભારત છોડવાનો નિર્દેશ આપતી નોટિસને બોમ્બે હાઇકોર્ટમાં પડકારી છે. તેમની અરજીમાં કાર્યવાહી મનસ્વી હોવાનો અને પોતાનો પક્ષ રજૂ કરવાની તક આપવામાં ન આવી હોવાનો દાવો કરાયો છે.

અમેરિકન નાગરિક અને ભારતીય મૂળના વિદેશી નાગરિકનું કાર્ડ ધરાવતા અભિનેતા ઇમરાન ખાને શનિવારે હાઇકોર્ટમાં અરજી દાખલ કરી હતી. વિદેશી પ્રાદેશિક નોંધણી કચેરીએ તેમને ૨૮ ઑક્ટોબર સુધીમાં ભારત છોડવાનો નિર્દેશ આપ્યો છે. અરજી અંગે આજે તાકીદની સુનાવણી માગવા રજૂઆત થવાની શક્યતા છે.

મુખ્ય ચૂંટણી કમિશનર જ્ઞાનેશકુમારના રાજીનામાની માગ સાથે ૧૦ ઑક્ટોબરે મુંબઈમાં યોજાયેલા વિરોધના સ્થળ નજીક ઇમરાનને પોલીસે થોડા સમય માટે અટકાયતમાં લીધા હતા. ત્યારબાદ તેમની સામે કાર્યવાહી થઈ હતી. ઇમરાને અરજીમાં દાવો કર્યો છે કે તેમણે પ્રતિબંધિત વિસ્તારમાં પ્રવેશ કર્યો નહોતો કે પોલીસના નિર્દેશનો ભંગ કર્યો નહોતો.

અરજી મુજબ નોટિસમાં ચોક્કસ ઉલ્લંઘન અને તેના આધારરૂપ સામગ્રી જણાવવામાં આવી નથી. ઇમરાને પોતાના કાર્ડથી મળતા ભારતમાં નિવાસના અધિકારનો પણ ઉલ્લેખ કર્યો છે. દરમિયાન તેમનું કાર્ડ કેમ રદ ન કરવું તે અંગે વધુ એક કારણદર્શક નોટિસ આપી ૧૫ દિવસમાં જવાબ માગવામાં આવ્યો છે.