મુંબઈ : જાણીતી બોલિવૂડ અને સાઉથ અભિનેત્રી શ્રુતિ હાસને પોતાના પર્સનાલિટી રાઈટ્સ (વ્યક્તિત્વ અધિકારો) અને પ્રાઈવસીની સુરક્ષા માટે બોમ્બે હાઈકોર્ટના દરવાજા ખટખટાવ્યા હતા, જ્યાં તેમને એક મોટો અને ઐતિહાસિક વિજય મળ્યો છે. બોમ્બે હાઈકોર્ટે શ્રુતિ હાસનના નામ, અવાજ, છબી અને સમાનતાનો સંમતિ વગર આર્ટિફિશિયલ ઈન્ટેલિજન્સ (AI) કે ડીપફેક ટેકનોલોજી દ્વારા અનધિકૃત ઉપયોગ કરવા પર સખત પ્રતિબંધ લગાવી દીધો છે. ન્યાયાધીશ માધવ જે. જામદારે શ્રુતિ હાસનની અરજી પર પ્રાથમિક દ્રષ્ટિએ મજબૂત કેસ ગણાવીને વચગાળાનો મનાઈહુકમ જારી કર્યો છે.

અભિનેત્રીએ કોર્ટના ધ્યાન પર આણ્યું હતું કે કેટલાક ઓનલાઈન પ્લેટફોર્મ્સ, AI ચેટબોટ્સ (જેવા કે FlowGPT અને Cloud Whale Interactive Technology) અને સોશિયલ મીડિયા એકાઉન્ટ્સ તેમની સંમતિ વિના તેમના ચહેરા અને અવાજનો ઉપયોગ કરીને AI-જનરેટેડ ડીપફેક્સ, મોર્ફ કરેલા વિડીયો, આપત્તિજનક ડીપફેક પોર્નોગ્રાફિક ઈમેજીસ અને ગેરકાયદે મર્ચેન્ડાઈઝ વેચી રહ્યા હતા. કોર્ટે ગંભીર નોંધ લેતા જણાવ્યું હતું કે ડીપફેક કન્ટેન્ટ એકવાર ઈન્ટરનેટ પર પ્રસારિત થઈ જાય પછી તે અમર્યાદિત ફેલાય છે, જેનાથી વ્યક્તિની ઈજ્જત અને જાહેર છબીને કાયમી ધોરણે નુકસાન થાય છે, જેની ભરપાઈ માત્ર નાણાકીય વળતરથી થઈ શકે નહીં.

બોમ્બે હાઈકોર્ટે ચુકાદામાં સ્પષ્ટ કર્યું કે ભારતીય બંધારણના આર્ટિકલ ૧૯(૧)(a) હેઠળ વાણી અને અભિવ્યક્તિની સ્વતંત્રતા તેમજ આર્ટિકલ ૨૧ હેઠળ જીવન જીવવા અને ગૌરવપૂર્ણ ગોપનીયતાના અધિકાર અંતર્ગત સેલિબ્રિટીઝના વ્યક્તિત્વ અધિકારોનું રક્ષણ થવું જરૂરી છે. કોર્ટે Google, Meta, X Corp અને Pinterest જેવા સોશિયલ મીડિયા પ્લેટફોર્મ્સ અને મધ્યસ્થીઓને નોટિસ મળતાં જ શ્રુતિ હાસન સાથે જોડાયેલી તમામ ઉલ્લંઘનકારી સામગ્રી અને લિંક્સને ત્વરિત હટાવવા અથવા એક્સેસ બ્લોક કરવા આદેશ આપ્યો છે. આ ઉપરાંત ગૂગલને આવી યુટ્યુબ ચેનલોની સબ્સ્ક્રાઇબર વિગતો આપવા પણ જણાવાયું છે.