અમદાવાદ : ભારતના અબજોપતિ ઉદ્યોગપતિ અને અદાણી ગ્રુપના ચેરમેન ગૌતમ અદાણી આજે ૨૪ જૂને તેમનો ૬૪મો જન્મદિવસ ઉજવી રહ્યા છે. દેશના ખૂણે-ખૂણામાં પોર્ટ્સ, એરપોર્ટ્સ અને ગ્રીન એનર્જી જેવા વિશાળ ઇન્ફ્રાસ્ટ્રક્ચર ઊભા કરનાર ગૌતમ અદાણીના શબ્દો હંમેશા ઊંચી મહત્વાકાંક્ષા, સચોટ ગણતરી સાથેના જોખમો અને દેશના વિકાસ પ્રત્યેની અતૂટ પ્રતિબદ્ધતાને દર્શાવે છે. તેમના આજના જન્મદિવસે, નવો બિઝનેસ શરૂ કરનારા ઉદ્યોગસાહસિકો અને યુવાનો માટે તેમના કેટલાક જીવનમંત્રો ભારે પ્રેરણાદાયી સાબિત થઈ રહ્યા છે.
આજના દિવસનો સૌથી શ્રેષ્ઠ અને ચર્ચાસ્પદ વિચાર આપતા તેમણે કહ્યું છે કે, "કાં તો તમે રોકડના ઢગલા પર બેસી રહો, અથવા તો સતત વૃદ્ધિ (ગ્રોથ) કરવાનું ચાલુ રાખો."
આ વાક્ય અદાણીની આગળ વધવાની ખાસ માનસિકતાને સ્પષ્ટ કરે છે. તેમનું માનવું છે કે કમાયેલી સંપત્તિને ક્યારેય નિષ્ક્રિય ન રાખવી જોઈએ. પૈસા એકઠા કરવા કરતાં વધુ મહત્વનું એ છે કે તે નાણાંનું નવી તકો ઊભી કરવા માટે, વ્યવસાયોના વિસ્તરણ માટે અને લોકકલ્યાણના કાર્યોમાં ફરીથી રોકાણ થવું જોઈએ. સતત નવીનતા લાવવી એ જ સાચો બિઝનેસ છે.
"ઉદ્યોગસાહસિક બનવું એ દ્રઢતાની અગ્નિપરીક્ષા છે"
પોતાના સંઘર્ષના દિવસોને યાદ કરતા ગૌતમ અદાણી જણાવે છે કે, "એક ઉદ્યોગસાહસિક (Entrepreneur) બનવું એ મારું સદાબહાર સપનું રહ્યું છે, કારણ કે આ ક્ષેત્ર માણસની ધીરજ અને દ્રઢતાની ખરી કસોટી કરે છે." કોઈપણ નવો વ્યવસાય કે સામ્રાજ્ય ઊભું કરવા માટે માત્ર મૂડીની નહીં, પણ ગમે તેવા મોટા પડકારો અને આંચકાઓ સામે અડીખમ ઊભા રહીને આગળ વધવાના અડગ નિશ્ચયની જરૂર પડે છે.
જોખમોનું સંચાલન અને રાષ્ટ્ર નિર્માણનો સંકલ્પ
વ્યવસાયમાં સફળતા મેળવવાની ચાવી આપતા અદાણી કહે છે કે, બિઝનેસ એ કોઈ સીધો રસ્તો નથી, તે જોખમો લેવા અને અનિશ્ચિતતાઓ તેમજ મુશ્કેલ સમયનું યોગ્ય સંચાલન કરવા વિશે છે. સફળતા ક્યારેય જોખમોથી ભાગવામાં નથી મળતી, પરંતુ તોફાની સમયમાં પણ સમજી-વિચારીને સાચા નિર્ણયો લેવામાં રહેલી છે.
અદાણી ગ્રુપ માટે ઇન્ફ્રાસ્ટ્રક્ચર ક્ષેત્ર માત્ર નફો કમાવવાનું સાધન નથી. ગૌતમ અદાણી તેને એક અલગ નજરીયાથી જુએ છે. તેમનું માનવું છે કે ઇન્ફ્રાસ્ટ્રક્ચર ઊભું કરવું એટલે દેશ માટે લાંબાગાળાની સંપત્તિનું સર્જન કરવું, જે આર્થિક પ્રગતિ લાવે, સામાન્ય લોકોનું જીવન ધોરણ સુધારે અને આખરે રાષ્ટ્ર નિર્માણમાં ભાગીદાર બને.
ગૌતમ અદાણીના પ્રેરણાદાયી સૂત્રો:
•    રોકાણનો મંત્ર: લક્ષ્ય માત્ર પૈસા કમાવવાનું નહીં, પણ નવી તકોનું સર્જન કરવાનું હોવું જોઈએ.
•    બિઝનેસ ફિલોસોફી: અનિશ્ચિતતાઓથી ડરવાને બદલે તેને મેનેજ કરતા શીખો.
•    મુખ્ય ધ્યેય: વ્યાપાર એવો હોવો જોઈએ જે દેશના હિત અને વિકાસ સાથે જોડાયેલો હોય.