​દિલ્હી : દક્ષિણ દિલ્હીના સત્યા નિકેતન વિસ્તારમાં બનેલી અત્યંત કરૂણ બિલ્ડિંગ ધરાશાયી થવાની ઘટનામાં ૭ નિર્દોષ લોકોના અકાળે મોત થયા બાદ સમગ્ર વિસ્તારમાં ભારે ચકચાર મચી ગઈ છે. આ દર્દનાક દુર્ઘટનાના સંદર્ભમાં દિલ્હીની પટિયાલા હાઉસ અદાલતે મહત્વનો નિર્ણય આપતાં ઘટના સંબંધિત પેઇંગ ગેસ્ટ (પીજી)ના ઓપરેટર શુભમ ત્યાગી દ્વારા દાખલ કરવામાં આવેલી આગોતરા જામીન અરજીને ફગાવી દીધી છે. અદાલતના આ કડક વલણ બાદ હવે પોલીસ માટે આ કેસના મુખ્ય આરોપી સુધી પહોંચવાનો માર્ગ મોકળો બન્યો છે.

​અદાલતમાં સુનાવણી દરમિયાન સરકારી વકીલે આગોતરા જામીનનો સખત વિરોધ કરતાં દલીલ કરી હતી કે, દુર્ઘટનાની ગંભીરતા અને કાવતરાના મૂળ સુધી પહોંચવા માટે આરોપી શુભમ ત્યાગીની કસ્ટોડિયલ પૂછપરછ અત્યંત આવશ્યક છે. 'હોસ્ટેલ ડેઝ' નામના નેટવર્ક હેઠળ આ વિસ્તારમાં સાત જેટલા પીજી ચલાવવામાં આવી રહ્યા હતા, જેમાં ઓગસ્ટ ૨૦૨૫થી આ ઈમારતના ચાર માળ મહિને રૂ. ૧.૦૫ લાખના ભાડાથી લેવામાં આવ્યા હતા. જર્જરિત સ્થિતિમાં હોવા છતાં આ બિલ્ડિંગનો ઉપયોગ રહેણાંક હેતુ માટે થતો હતો અને ત્યાં ગેરકાયદેસર બાંધકામ કે સમારકામની કામગીરી ચાલી રહી હતી.

​બીજી તરફ, બચાવ પક્ષના વકીલે એવો દાવો કર્યો હતો કે શુભમ ત્યાગી વ્યવસાયે વકીલ છે અને તેને આ કેસમાં ખોટી રીતે વણસી લેવામાં આવી રહ્યો છે. તેમણે રજૂઆત કરી હતી કે જે ભાગમાં ઘટના બની તે સાથે તેમના અસીલનો સીધો સંબંધ નહોતો તેમજ તમામ ભાડા કરાર અને દસ્તાવેજો પોલીસ પાસે જમા થઈ ચૂક્યા હોવાથી કસ્ટડીની કોઈ જરૂરિયાત નથી. જોકે, અદાલતે બંને પક્ષોની દલીલો સાંભળ્યા બાદ ગંભીરતાને ધ્યાને રાખીને જામીન અરજી ફગાવી દીધી હતી.

​ઉલ્લેખનીય છે કે, ૫ માળની આ ઈમારત ધરાશાયી થતાં કટકા થઈને જમીનદોસ્ત થઈ ગઈ હતી, જેમાં રેસ્ક્યૂ ઓપરેશન દરમિયાન ૧૨ લોકોને બહાર કાઢવામાં આવ્યા હતા, જેમાંથી ૭ લોકોના કરૂણ મોત નીપજ્યા હતા. દિલ્હી પોલીસે આ કેસમાં બિલ્ડિંગ માલિકના પુત્ર મહેશ ગુપ્તા, કોન્ટ્રાક્ટર સનોજ અને અન્ય પીજી ઓપરેટર સુધંશુની પણ અટકાયત કરીને રિમાન્ડ મેળવ્યા છે. જ્યારે બિલ્ડિંગના મૂળ માલિક હરિરામ ગુપ્તા અને ઉર્મિલા ગુપ્તાને અગાઉથી જ ન્યાયિક કસ્ટડીમાં મોકલી દેવાયા છે. કાયદાકીય દંડો પછાડતા પોલીસે દાવો કર્યો છે કે, વિદ્યાર્થીઓ અને રહેવાસીઓના જીવ જોખમમાં મૂકનારા તમામ જવાબદારો સામે કડકમાં કડક કાર્યવાહી કરવામાં આવશે.