મુંબઈ, તા.21: બોલિવૂડ અભિનેતા ટાઈગર શ્રોફ પર જુહુ વિસ્તારમાં થયેલા જાનલેવા હુમલાની ઘટના બાદ હવે મહારાષ્ટ્રના રાજકારણમાં અને બોલિવૂડ ક્ષેત્રે ભયનો વાતાવરણ વધુ ઘેરો બન્યો છે. નાયબ મુખ્યમંત્રી એકનાથ શિંદે જૂથના શિવસેના નેતા રાહુલ કનાલે પોતાના જીવ પર ગંભીર જોખમ હોવાની આશંકા વ્યક્ત કરીને મુંબઈ પોલીસ કમિશનર દેવેન ભારતીને પત્ર લખીને તાકીદે ખાસ સુરક્ષા પૂરી પાડવા વિનંતી કરી છે.

શિવસેના નેતા રાહુલ કનાલે પત્રમાં અત્યંત ચોંકાવનારો દાવો કરતા જણાવ્યું છે કે છેલ્લા કેટલાક દિવસો દરમિયાન અજાણ્યા શંકાસ્પદ વ્યક્તિઓ દ્વારા તેમના નિવાસસ્થાન તેમજ કાર્યાલયની ઓછામાં ઓછી ત્રણ વખત રેકી (નિરીક્ષણ) કરવામાં આવી છે. બોલિવૂડ અભિનેતા સલમાન ખાન સાથે ગાઢ અને મજબૂત સંબંધો ધરાવતા કનાલે આશંકા વ્યક્ત કરી છે કે ગુનાહિત તત્વો તેમને પણ પોતાનું આગામી નિશાન બનાવી શકે છે, જેથી તેમને તુરંત પોલીસ રક્ષણ મળવું જરૂરી છે.

ઉલ્લેખનીય છે કે ગત ૧૮ ઓક્ટોબરના રોજ જુહુ ખાતે ફૂટબોલ મેચ રમીને પરત ફરી રહેલા અભિનેતા ટાઈગર શ્રોફની કાર પર મોટરસાઈકલ પર આવેલા હુમલાખોરોએ અંધાધૂંધ ગોળીબાર કર્યો હતો. આ સનસનાટીભર્યા હુમલામાં શ્રોફ સદ્નસીબે ગોળી વાગવાથી બચી ગયા હતા, પરંતુ તૂટેલા કાચ અને ગનપાઉડરના કારણે તેમને સામાન્ય ઈજાઓ પહોંચી હતી. આ ઘટનામાં તેમના ડ્રાઈવર અને એક અન્ય રિક્ષાચાલક પણ ઈજાગ્રસ્ત થયા હતા.

આ ચર્ચિત ગોળીબાર કેસમાં મુંબઈ પોલીસને મોટી સફળતા મળી છે. પોલીસે કાર્યવાહી કરીને રાજસ્થાનના કોટા ખાતેથી ફૂલ સિંહ, હૃતિક કુમાર અને રેહાન નામના ત્રણ આરોપીઓની ધરપકડ કરી છે અને બુધવારે વહેલી સવારે તેઓને વધુ તપાસ અર્થે મુંબઈ લાવવામાં આવ્યા છે.

ઘટના બાદ કુખ્યાત લોરેન્સ બિશ્નોઈ ગેંગે આ હુમલાની જવાબદારી સ્વીકારી હોવાના દાવા સોશિયલ મીડિયા પર વાયરલ થયા છે. ‘અનમોલ બિશ્નોઈ’ નામના ફેસબુક એકાઉન્ટ પરથી પોસ્ટ કરીને દાવો કરાયો હતો કે ટાઈગર શ્રોફને અગાઉ ચેતવણી આપવામાં આવી હોવા છતાં તેમણે તેને ગંભીરતાથી લીધી ન હતી.

આ વિવાદસ્પદ સંદેશામાં બિશ્નોઈ ગેંગ દ્વારા મુંબઈ ફિલ્મ ઉદ્યોગના અન્ય કલાકારો અને હસ્તીઓને પણ ખુલ્લી ધમકી આપવામાં આવી છે. જે કોઈપણ સભ્યો ગેંગની માંગણીઓ ન માનતા હોય અથવા અભિનેતા સલમાન ખાન સાથે સંબંધો કે કામ કરવાનું ચાલુ રાખશે, તેમને ગંભીર પરિણામો ભોગવવાની ચેતવણી આપવામાં આવી છે, જેના કારણે મુંબઈ પોલીસ હાઈએલર્ટ પર આવી ગઈ છે.