નવી દિલ્હી : રાષ્ટ્રીય રાજધાની દિલ્હી અને તેની આસપાસના એનસીઆર વિસ્તારોમાં હવામાનનો મિજાજ ફરી એકવાર બદલાયો છે. શુક્રવારે સતત વરસેલા વરસાદને કારણે શહેરમાં ઠેર-ઠેર પાણી ભરાઈ ગયા હતા અને લાંબા ટ્રાફિકજામ સર્જાયા હતા, તેમાંથી લોકો માંડ બહાર આવી રહ્યા હતા ત્યાં શનિવારે ફરીથી વરસાદ શરૂ થઈ ગયો છે. આ સ્થિતિને ધ્યાનમાં રાખીને ભારત મૌસમ વિજ્ઞાન વિભાગે શહેરના કેટલાક ભાગો માટે રેડ એલર્ટ जारी કર્યું છે, જ્યારે અન્ય વિસ્તારોમાં ઓરેંજ એલર્ટ જાળવી રાખવામાં આવ્યું છે. હવામાન વિભાગે દિવસ દરમિયાન ગાજવીજ સાથે મધ્યમથી ભારે વરસાદની આગાહી કરી છે.

આ ખરાબ હવામાનને કારણે વિમાન સેવાઓ પણ ભારે પ્રભાવિત થઈ છે. અગ્રણી એરલાઇન ઇન્ડિગોએ શનિવારે એક પ્રવાસ સલાહકાર જાહેર કરીને મુસાફરોને દિલ્હીમાં ખરાબ હવામાનને કારણે ફ્લાઇટ મોડી પડવાની સંભાવના અંગે ચેતવણી આપી છે. એરલાઇને જણાવ્યું છે કે તેમની ટીમો સ્થિતિ પર નજર રાખી રહી છે અને મુસાફરોને વિમાનમથકે નીકળતા પહેલા વેબસાઇટ પર ફ્લાઇટનું સ્ટેટસ ચકાસી લેવા અપીલ કરવામાં આવી છે. રસ્તાઓની સ્થિતિ ખરાબ હોવાને કારણે મુસાફરોને વધારાનો સમય ફાળવીને મુસાફરી કરવાની સલાહ આપવામાં આવી છે.

દિલ્હી અને ગુરુગ્રામના અનેક રસ્તાઓ પાણીમાં ડૂબી ગયા છે, જેના કારણે મુખ્ય સ્થળો પર ભારે ટ્રાફિકજામ સર્જાયો છે. રાષ્ટ્રીય રાજધાનીમાં ઇન્દિરા ગાંધી આંતરરાષ્ટ્રીય વિમાનમથક પાસે ભારે પાણી ભરાવાને કારણે ફ્લાઇટ ઓપરેશનને અસર થઈ છે, અને મુસાફરોએ પાણી ભરેલા રસ્તાઓમાંથી પસાર થવું પડ્યું છે. સ્વતંત્ર હવામાનશાસ્ત્રીઓના જણાવ્યા અનુસાર નોઈડા, ગાઝિયાબાદ અને ફરીદાબાદમાં ભારે વરસાદ પડવાની સંભાવના છે, જેનાથી આગામી કલાકોમાં પાણી ભરાવાની સમસ્યા વધુ ગંભીર બની શકે છે.

હવામાન વિભાગના આગામી દિવસોના પ્રીડિક્શન મુજબ દિલ્હીમાં આગામી સપ્તાહ દરમિયાન સામાન્ય રીતે વાદળછાયું વાતાવરણ રહેશે અને હળવાથી મધ્યમ વરસાદની સંભાવના વ્યક્ત કરવામાં આવી છે. તાપમાનમાં પણ ઘટાડો નોંધાયો છે, જેનાથી લોકોને ગરમીથી રાહત મળી છે પરંતુ સતત વરસાદને કારણે નાગરિકોની મુશ્કેલીઓમાં વધારો થયો છે. તંત્ર દ્વારા નીચાણવાળા વિસ્તારોમાંથી પાણી નિકાલ કરવાની કામગીરી યુદ્ધના ધોરણે હાથ ધરવામાં આવી રહી છે.