રુદ્રપ્રયાગ, તા. ૬ : ઉત્તરાખંડના પર્વતીય વિસ્તારોમાં સતત વરસાદને કારણે અલકનંદા અને મંદાકિની નદીઓના જળસ્તરમાં નોંધપાત્ર વધારો થયો છે. રુદ્રપ્રયાગ ખાતે બંને નદીઓના પવિત્ર સંગમસ્થળે ભારે પાણી અને કાંપયુક્ત ધસમસતો પ્રવાહ જોવા મળ્યો હતો. વરસાદ પછી સર્જાયેલો સંગમનો નજારો આકર્ષક હોવા સાથે જોખમી પણ બન્યો છે.

જિલ્લા આપત્તિ નિયંત્રણ કક્ષાના જણાવ્યા પ્રમાણે બંને નદીઓનો પ્રવાહ ચેતવણી સપાટીની નજીક હોવાથી સ્થિતિ ઉપર સતત દેખરેખ રાખવામાં આવી રહી છે. નદીકાંઠાના લોકોને પાણીથી દૂર રહેવા, પશુઓને સુરક્ષિત સ્થળે ખસેડવા અને યાત્રાળુઓને હવામાન તથા માર્ગોની સ્થિતિ તપાસ્યા પછી જ આગળ વધવા સૂચના અપાઈ છે.

પર્વતીય વિસ્તારમાં નાનાં ઝરણાં અને નાળાં પણ છલકાયા છે. ભૂસ્ખલન થવાની સંભાવનાને ધ્યાનમાં રાખીને સંવેદનશીલ માર્ગો ઉપર કર્મચારીઓને તૈયાર રાખવામાં આવ્યા છે. તંત્રે અફવાઓથી દૂર રહી સત્તાવાર સૂચનાઓ અનુસરવા અપીલ કરી છે.