લખનૌ : ઉત્તર પ્રદેશના કૃષિ અને બાગાયતી ક્ષેત્રને આધુનિક અને વધુ નફાકારક બનાવવા માટે કેન્દ્ર સરકાર અને રાજ્ય સરકારે સંયુક્ત રીતે કમર કસી લીધી છે. લખનૌના યોજના ભવન ખાતે આજે ઉત્તર પ્રદેશના મુખ્યમંત્રી યોગી આદિત્યનાથ અને કેન્દ્રીય કૃષિ, ખેડૂત કલ્યાણ તેમજ ગ્રામીણ વિકાસ મંત્રી શિવરાજ સિંહ ચૌહાણની અધ્યક્ષતામાં એક હાઈલેવલ બેઠક યોજાઈ હતી. આ બેઠકમાં કેન્દ્રીય મંત્રી ચૌહાણે ઉત્તર પ્રદેશના બાગાયતી (હોર્ટિકલ્ચર) ક્ષેત્રના વિકાસને રોકેટ ગતિ આપવા માટે લખનૌમાં એક અત્યાધુનિક ‘સ્વચ્છ પ્લાન્ટ સેન્ટર’ (Clean Plant Centre) સ્થાપવાની જાહેરાત કરી છે. આ કેન્દ્ર દ્વારા ખેડૂતોને ઉચ્ચ ગુણવત્તાવાળી અને સંપૂર્ણપણે રોગમુક્ત વાવેતર સામગ્રી તેમજ છોડ પૂરા પાડવામાં આવશે, જે ખેડૂતોની આવકમાં બમ્પર વધારો કરવામાં પાયાનો પથ્થર સાબિત થશે.

ખેડૂતો માટે ખુશખબર: સરકારી ખરીદીની મુદત વધી

બેઠક દરમિયાન કેન્દ્રીય મંત્રીએ યુપીના ખેડૂતોના હિતમાં વધુ એક મોટો નિર્ણય લીધો હતો. તેમણે રાજ્યમાં ચણા, મસૂર અને સરસવ જેવા મહત્વના પાકો માટે સરકારી ખરીદીનો સમયગાળો લંબાવવાની સત્તાવાર મંજૂરી આપી હતી અને આ અંગેનો મંજૂરી પત્ર સીએમ યોગી આદિત્યનાથને રૂબરૂ સોંપ્યો હતો. આ નિર્ણયથી ખેડૂતોને પોતાના પાકના ટેકાના ભાવ મેળવવામાં વધુ સમય અને મોટી રાહત મળશે. આ ઉપરાંત, ગ્રામીણ વિકાસને વેગ આપતા તેમણે પ્રધાનમંત્રી આવાસ યોજના (ગ્રામીણ) ના આગામી તબક્કા માટે પસંદ કરાયેલા ૬,૧૮,૪૮૨ પાત્ર લાભાર્થીઓની યાદી પણ મુખ્યમંત્રીને સોંપીને ઉત્કૃષ્ટ કામગીરી બદલ રાજ્ય સરકારને અભિનંદન પાઠવ્યા હતા.

જુલાઈથી શરૂ થશે નવું મહાઅભિયાન ‘VB-GRAM’

ગ્રામીણ વિસ્તારોમાં રોજગારીની તકો વધારવા માટે કેન્દ્રીય કૃષિ મંત્રીએ આગામી જુલાઈ મહિનાથી શરૂ થઈ રહેલા અતિ મહત્વકાંક્ષી કાર્યક્રમ 'વિકસિત ભારત-ગેરંટી ફોર રોજગાર ઔર આજીવિકા મિશન (ગ્રામીણ)' એટલે કે VB-GRAM ના અસરકારક અને સમયસર અમલીકરણ પર વિશેષ ભાર મૂક્યો હતો. તેમણે રાજ્યના વરિષ્ઠ અધિકારીઓને કડક આદેશ આપ્યા હતા કે, મનરેગા (MNREGA) હેઠળના તમામ બાકી લેણાંના નિકાલ માટેની દરખાસ્તો ભારત સરકારને તાત્કાલિક મોકલી આપવામાં આવે, જેથી નવા રોજગાર મિશનની શરૂઆતમાં કોઈ વિલંબ ન થાય.

‘અલ નીનો’ ના ખતરા સામે એક્શન પ્લાન તૈયાર

આ મહત્વપૂર્ણ બેઠકમાં વૈશ્વિક હવામાનની ઘટના 'અલ નીનો' (El Nino) ના કારણે ઉત્તર પ્રદેશના કૃષિ ક્ષેત્ર પર પડનારી સંભવિત માઠી અસરો અને દુષ્કાળ જેવી સ્થિતિની પણ ગંભીર સમીક્ષા કરવામાં આવી હતી. કેન્દ્ર અને રાજ્યના ટોચના અધિકારીઓએ પાણીના સંરક્ષણ (વોટર કન્ઝર્વેશન), સ્માર્ટ પાક વ્યવસ્થાપન અને આબોહવા-સ્થિતિસ્થાપક (Climate-Resilient) કૃષિ પદ્ધતિઓ અપનાવવા અંગે લાંબુ મંથન કર્યું હતું. કુદરતી આફતો સામે ખેડૂતોના હિતોનું રક્ષણ કરવા માટે સમયસર અને પરસ્પર સંકલિત આકસ્મિક કાર્ય યોજના (કોન્ટિન્જન્સી પ્લાન) અપનાવવા પર બંને પક્ષો વચ્ચે સંપૂર્ણ સર્વસંમતિ સધાઈ હતી.