કોલકાતા : કોલકાતાના નેતાજી સુભાષ ચંદ્ર બોઝ આંતરરાષ્ટ્રીય વિમાનમથકે બુધવારે સવારે તે સમયે હળકચ મચી ગયો જ્યારે મુંબઈ જઈ રહેલી એર ઈન્ડિયાની ફ્લાઈટમાં હાઈજેકની ગંભીર ધમકી મળી. વિમાન જ્યારે ટેકઓફ કરવાની તૈયારી કરી રહ્યું હતું, તે દરમિયાન તેના શૌચાલયના અરીસા પર હાઈજેક સંબંધિત એક ધમકીભર્યો સંદેશ લખેલો જોવા મળ્યો હતો, જેના કારણે એરપોર્ટ પ્રશાસનમાં દોડધામ મચી ગઈ હતી.

ઘટનાની ગંભીરતાને ધ્યાનમાં રાખીને, પાઇલટે તાત્કાલિક સમજદારી વાપરીને એર ટ્રાફિક કંટ્રોલ (ATC) ને આ મામલાની સત્તાવાર જાણ કરી હતી. એટીસી પાસેથી મંજૂરી મળ્યા બાદ સુરક્ષાના ભાગરૂપે વિમાનને તાત્કાલિક સુરક્ષિત આઇસોલેશન બેમાં ખસેડવામાં આવ્યું હતું, જ્યાં મુસાફરોની સુરક્ષા સુનિશ્ચિત કરવા માટે તાત્કાલિક ધોરણે આગળની કાર્યવાહી હાથ ધરવામાં આવી હતી.

વિમાનને આઇસોલેશન બેમાં પહોંચાડ્યા બાદ સેન્ટ્રલ ઇન્ડસ્ટ્રિયલ સિક્યુરિટી ફોર્સ (CISF) અને એરપોર્ટના ખાસ સુરક્ષા અધિકારીઓ દ્વારા વિમાનની અંદર વ્યાપક સ્તરે સર્ચ ઓપરેશન શરૂ કરવામાં આવ્યું હતું. બોમ્બ ડિસ્પોઝલ સ્કવોડ અને સ્નિફર ડોગ્સની મદદથી વિમાનના એકેએક ખૂણાની ઝીણવટભરી તપાસ કરવામાં આવી રહી છે જેથી કોઈપણ શંકાસ્પદ વસ્તુ કે ખતરાને સમયસર શોધી શકાય.

આ ઘટના બાદ એવિએશન સેફટી અને એરપોર્ટ સુરક્ષાને વધુ સઘન બનાવવાની દિશામાં કડક પગલાં લેવામાં આવી રહ્યા છે, જ્યારે સુરક્ષા એજન્સીઓ દ્વારા આ ધમકી પાછળ કોનો હાથ છે અને અરીસા પર સંદેશ કોણે લખ્યો તેની ઊંડાણપૂર્વક તપાસ ચાલી રહી છે