નવી દિલ્હી, તા.૦૭: એર ઇન્ડિયા અને સિંગાપોર એરલાઇન્સ (SIA) આગામી ૧૫ ઓક્ટોબરથી તેમના વાણિજ્યિક સહયોગનો વ્યાપક સ્તરે વિસ્તાર કરવા માટે સંપૂર્ણપણે તૈયાર છે. આ વ્યૂહાત્મક ભાગીદારીના વિસ્તરણથી ભારત અને સિંગાપોર વચ્ચે મુસાફરી કરતા પ્રવાસીઓને ફ્લાઇટના વધુ ઉત્તમ વિકલ્પો ઉપલબ્ધ થશે અને વારંવાર ઉડાન ભરનારા (ફ્રિક્વન્ટ ફ્લાયર) સભ્યો માટે પારસ્પરિક સુવિધાઓમાં પણ મોટો વધારો થશે.

આ ભાગીદારી જાન્યુઆરી ૨૦૨૬માં હસ્તાક્ષર કરાયેલા વાણિજ્યિક સહકાર ફ્રેમવર્ક કરારનો ભાગ છે, જેનો પ્રથમ તબક્કો સિંગાપોર અને ભારતના આઠ પ્રમુખ શહેરો જેમાં અમદાવાદ, બેંગલુરુ, ચેન્નાઈ, દિલ્હી, હૈદરાબાદ, કોચી, કોલકાતા અને મુંબઈનો સમાવેશ થાય છે, તેને જોડતી કુલ ૧૨૬ સાપ્તાહિક ફ્લાઇટ્સને આવરી લેશે.

આગામી ૧૫ ઓક્ટોબરથી કોઈપણ એરલાઇન દ્વારા સંચાલિત યોગ્ય ફ્લાઇટ્સ અન્ય કેરિયરની વેબસાઇટ, મોબાઇલ એપ્લિકેશન અને અધિકૃત ટ્રાવેલ એજન્સીઓ દ્વારા અલગથી સરળતાથી બુક કરી શકાશે. અગાઉ એર ઇન્ડિયા દ્વારા સંચાલિત ફ્લાઇટને સિંગાપોર એરલાઇન્સની ફ્લાઇટ સાથે જોડવાની જે આવશ્યકતા રહેતી હતી, તે આ નવા ફેરફારથી દૂર થઈ જશે અને મુસાફરો માટે પ્રક્રિયા વધુ સરળ બનશે.

એરલાઇન્સ દ્વારા મહારાજા ક્લબ અને ક્રિસફ્લાયરના સભ્યો માટે વિશેષ લાભો આપવાની પણ યોજના ઘડવામાં આવી છે. વર્ષ ૨૦૨૭ના બીજા ક્વાર્ટરથી મહારાજા ક્લબ પ્લેટિનમ અને ક્રિસફ્લાયર પીએફએસ ક્લબના સભ્યોને એરપોર્ટ પર પ્રાથમિકતા ચેક-ઇન અને બોર્ડિંગ જેવી વિશેષ સુવિધાઓ મળશે. આ ઉપરાંત, મહારાજા ક્લબ સિલ્વર અને ક્રિસફ્લાયર એલીટ સિલ્વર સભ્યોને પણ પાત્ર રૂટ પર વધારાનું સામાન ભથ્થું અને પ્રાથમિકતા બોર્ડિંગનો લાભ મળશે.

એર ઇન્ડિયાના ચીફ કોમર્શિયલ ઓિફસર નિપુણ અગ્રવાલે આ અંગે જણાવ્યું હતું કે, અમારું મુખ્ય લક્ષ્ય ભારત અને સિંગાપોર વચ્ચે મુસાફરી કરતા અમારા સામાન્ય ગ્રાહકોના અનુભવમાં વધુ સુસંગતતા લાવવાનું છે, જેથી તેમને વધુ સારી પસંદગી, સુવિધા અને મૂલ્ય મળી શકે. સિંગાપોર એરલાઇન્સના ચીફ કોમર્શિયલ ઓફિસર લી લિક સિને પણ ઉમેર્યું હતું કે આ ભાગીદારીથી ગ્રાહકોને ઉત્તમ વિકલ્પો મળશે અને ફ્રિક્વન્ટ ફ્લાયર સભ્યોના પારસ્પરિક લાભો પણ વધશે.

આ સહયોગથી બંને દેશો વચ્ચેના હવાઈ જોડાણને વેગ મળશે અને મુસાફરોનો સમય તેમજ નાણાં બંનેની બચત થશે. ઉદ્યોગ જગતના જાણકારોના મતે, આ ભાગીદારીથી એશિયન એવિએશન માર્કેટમાં સ્પર્ધાત્મકતા વધશે અને પ્રવાસીઓને વિશ્વસ્તરીય સેવાનો અનુભવ પ્રાપ્ત થશે.