નવી દિલ્હી | તા. 27: એર ઈન્ડિયામાં મુસાફરી કરવા ઈચ્છતા મુસાફરો માટે માઠા સમાચાર સામે આવ્યા છે. સતત વધી રહેલા એવિએશન ટર્બાઈન ઈંધણ (ATF) ના ભાવ અને તેને કારણે ઓપરેટિંગ ખર્ચમાં થયેલા તોતિંગ વધારાને પહોંચી વળવા માટે એર ઈન્ડિયાએ પોતાની ડોમેસ્ટિક ફ્લાઈટ્સમાં ૨૨ ટકાનો કાપ મૂકવાનો નિર્ણય લીધો છે. એરલાઈન્સના આ નિર્ણયથી સ્થાનિક સ્તરે મુસાફરી કરતા હજારો પ્રવાસીઓના પ્રવાસના પ્લાન ખોરવાઈ શકે છે.
સ્થિતિ ક્યારે સામાન્ય થશે?
એર ઈન્ડિયા હાલમાં સાપ્તાહિક ધોરણે લગભગ ૪,૪૦૦ ફ્લાઈટ્સનું સંચાલન કરે છે, જેમાં ૩,૬૦૦ ડોમેસ્ટિક અને ૮૦૦ આંતરરાષ્ટ્રીય સેવાઓનો સમાવેશ થાય છે. વધતા ખર્ચના દબાણ હેઠળ એરલાઈન્સે માત્ર ડોમેસ્ટિક જ નહીં, પરંતુ આંતરરાષ્ટ્રીય ફ્લાઈટ્સમાં પણ આશરે ૨૭ ટકાનો ઘટાડો કર્યો છે. કંપનીના નિવેદન મુજબ, જૂન અને ઓગસ્ટ ૨૦૨૬ વચ્ચે આ ફેરફારો અમલી રહેશે. જોકે, એર ઈન્ડિયાએ સ્પષ્ટતા કરી છે કે તેઓ માંગ અને બજારની સ્થિતિની સતત સમીક્ષા કરતા રહેશે અને પરિસ્થિતિ સામાન્ય થતા જ ફ્લાઈટ્સની સંખ્યામાં ફરી વધારો કરવામાં આવશે.
આ જાહેરાત બાદ મુસાફરોએ શું કરવું?
એર ઈન્ડિયાએ આ ફેરફારોને લઈને પ્રભાવિત મુસાફરોને ચિંતા ન કરવા જણાવ્યું છે. જે પ્રવાસીઓની ફ્લાઈટ્સ આ કાપને કારણે રદ થશે, તેમને એરલાઈન્સ દ્વારા ત્રણ મુખ્ય વિકલ્પો આપવામાં આવશે: પ્રથમ, તેમને અન્ય વૈકલ્પિક ફ્લાઈટ્સમાં એડજસ્ટ કરવામાં આવશે; બીજો, વધારાના કોઈ પણ ચાર્જ વિના પ્રવાસનું રિ-શેડ્યુલિંગ કરી આપવામાં આવશે; અને ત્રીજો, જો મુસાફર પ્રવાસ કરવા ન માંગતા હોય તો તેમને ટિકિટના સંપૂર્ણ રિફંડની સુવિધા પણ આપવામાં આવશે. મુસાફરોને સલાહ આપવામાં આવે છે કે તેઓ એર ઈન્ડિયાની વેબસાઈટ કે એપ દ્વારા પોતાની ફ્લાઈટનું સ્ટેટસ તપાસી લે.