નવી દિલ્હી, તા.૦૮: ઇન્ડિયન મોબાઇલ કોંગ્રેસ (IMC) 2026ના ભવ્ય મંચ પરથી રિલાયન્સ જિયો ઇન્ફોકોમના ચેરમેન આકાશ અંબાણીએ પ્રધાનમંત્રી નરેન્દ્ર મોદીના નેતૃત્વ અને વિઝનના મુક્ત મને વખાણ કર્યા છે. તેમણે જણાવ્યું હતું કે, પીએમ મોદીનું વિઝન સમગ્ર ડિજિટલ ક્ષેત્ર માટે એક માર્ગદર્શક પ્રકાશ સમાન છે. ભારત માત્ર ટેકનોલોજીનો ઉપભોક્તા (ગ્રાહક) બનીને ન રહે પરંતુ પોતે જ નવીન ટેકનોલોજીનો સર્જક (ક્રિએટર) બને તે દિશામાં પ્રધાનમંત્રીની પ્રેરણાથી જિયો નિરંતર આગળ વધી રહ્યું છે.

જિયોના સફળ ૧૦ વર્ષ પૂર્ણ થવાના આ મહત્વપૂર્ણ અવસરે વાત કરતા આકાશ અંબાણીએ ઉમેર્યું હતું કે, પીએમ મોદીનું મિશન ટેલિકોમ ઉદ્યોગને એક નવી ઊંચાઈ પર લઈ જવા માટે પ્રોત્સાહિત કરે છે. ઉપભોક્તાઓ માટે ક્રાંતિકારી અને નવીન સેવાઓ લાવવી એ કંપનીનો મુખ્ય ઉદ્દેશ્ય રહ્યો છે. ટેકનોલોજીના ક્ષેત્રમાં આત્મનિર્ભરતા મેળવવી એ જ સાચો માર્ગ છે અને જિયો આ જ સંકલ્પ સાથે આગળ વધી રહ્યું છે.

IMC 2026 દરમિયાન જિયોએ દેશમાં કનેક્ટિવિટીના એક નવા યુગનો પ્રારંભ કરતા પોતાના 'સેટેલાઇટ કનેક્ટિવિટી વિઝન'નું અનાવરણ કર્યું હતું. આ યોજના અંતર્ગત કંપની પૃથ્વીની નીચલી ભ્રમણકક્ષા (LEO) માં અંદાજે ૧,૬૦૦ સેટેલાઇટનું એક મોટું નેટવર્ક ગોઠવવા પર કામ કરી રહી છે. આ ઉપરાંત, દેશના અંતરિયાળ અને દુર્ગમ વિસ્તારો સુધી સીમલેસ કનેક્ટિવિટી પહોંચાડવા માટે સમગ્ર ભારતમાં ૨૩ ગ્રાઉન્ડ સ્ટેશનો સ્થાપવાનો પણ મોટો પ્લાન તૈયાર કરવામાં આવ્યો છે.

જિયો દ્વારા આ પહેલ 'સાર્વભૌમ સેટેલાઇટ કનેક્ટિવિટી' (Sovereign Satellite Connectivity) ના બેનર હેઠળ રજૂ કરવામાં આવી છે. આ પ્રોજેક્ટની સૌથી મોટી વિશેષતા એ છે કે તેની ડિઝાઇનીંગ, એન્જિનિયરિંગ, ઇન્ટિગ્રેશનથી લઈને તેના લોન્ચિંગ અને કામગીરી સુધીની સમગ્ર પ્રોસેસ સંપૂર્ણપણે ભારતમાં જ કરવામાં આવશે. જેનાથી ભારત સેટેલાઇટ ટેકનોલોજીની સમગ્ર વેલ્યુ ચેઇનમાં સ્વનિર્ભર બનશે અને વિદેશી તકનીક પર આધાર રાખવો પડશે નહીં.

કાર્યક્રમના ઉદ્ઘાટન પ્રસંગે પ્રધાનમંત્રી નરેન્દ્ર મોદીએ ભારતની ટેલિકોમ ક્રાંતિનો ઉલ્લેખ કરતા જણાવ્યું હતું કે, દેશનું ટેલિકોમ ક્ષેત્ર હવે માત્ર નેટવર્ક અને સ્પેક્ટ્રમ પૂરતું મર્યાદિત નથી રહ્યું. આજે મોબાઇલ ફોન અને ડિજિટલ કનેક્ટિવિટી ગુડ ગવર્નન્સ (સુશાસન) નું એક શક્તિશાળી માધ્યમ બની ચૂક્યા છે. આજે દેશના દરેક જિલ્લામાં ૫.૫ લાખથી વધુ બેઝ સ્ટેશનો સાથે 5G નેટવર્ક પહોંચી ગયું છે, અને મોબાઇલ ઇન્ટરનેટ સ્પીડ વર્ષ ૨૦૨૨ની સરખામણીએ ૧૦ ગણી વધી ગઈ છે.

ઉલ્લેખનીય છે કે, ટેલિકોમ વિભાગ અને સેલ્યુલર ઓપરેટર્સ એસોસિએશન ઓફ ઇન્ડિયા (COAI) દ્વારા આયોજિત ઇન્ડિયન મોબાઇલ કોંગ્રેસ (IMC 2026) ની આ ૧૦મી આવૃત્તિ દેશની રાજધાની નવી દિલ્હી ખાતે ૭ ઓક્ટોબરથી ૧૦ ઓક્ટોબર દરમિયાન યોજાઈ રહી છે. આ વૈશ્વિક મંચ પરથી ભારતીય ટેલિકોમ કંપનીઓ દેશને ડિજિટલ સુપરપાવર બનાવવા માટે પોતાની અદ્યતન તકનીકો અને ભવિષ્યની યોજનાઓ રજૂ કરી રહી છે.