લખનૌ : ઉત્તર પ્રદેશના મુખ્યમંત્રી યોગી આદિત્યનાથે અયોધ્યામાં આયોજિત દીપોત્સવના કાર્યક્રમ દરમિયાન જાહેરમાં નિવેદન આપતા જણાવ્યું હતું કે જે લોકોએ ભૂતકાળમાં રામભક્તો પર ગોળીબાર કરાવ્યા હતા અને સંતો પર લાઠીચાર્જ કરાવીને અપમાન કર્યું હતું, તેમણે રામ મંદિરની મુલાકાતે આવતા પહેલા સંતો અને ભક્તોની માફી માંગવી જોઈએ.

પ્રાપ્ત વિગતો અનુસાર, સમાજવાદી પાર્ટીના વડા અખિલેશ યાદવ દ્વારા આગામી ૧૨ ડિસેમ્બરના રોજ પોતાની પત્ની સાથે અયોધ્યા સ્થિત રામ મંદિર અને હનુમાનગઢીની મુલાકાત લેવાના નિર્ધારિત કાર્યક્રમની જાહેરાત કરવામાં આવી હતી, જેના પગલે મુખ્યમંત્રી દ્વારા આ આક્રોશપૂર્ણ નિવેદન સામે આવ્યું છે.

મુખ્યમંત્રીએ અયોધ્યાના જૂના સંઘર્ષોને યાદ કરતા જણાવ્યું હતું કે એક સમય એવો પણ હતો જ્યારે આ પવિત્ર ભૂમિ પર ભગવાન શ્રી રામનું નામ લેવા પર પણ પ્રતિબંધો મૂકવામાં આવતા હતા અને ગોળીઓ તથા લાઠીઓનો સામનો કરવો પડતો હતો, પરંતુ આજે પ્રભુની કૃપાથી અયોધ્યા તેની દિવ્ય ઓળખ પુનઃ પ્રાપ્ત કરી રહી છે.

તેમણે વધુમાં ઉમેર્યું હતું કે રાજકીય નેતાઓએ મંદિર નગરીની ઉપેક્ષા કરવા અને સંત સમાજની ભાવનાઓને ઠેસ પહોંચાડવાના પોતાના ભૂતકાળના કૃત્યો પસ્તાવો કરીને પહેલા રામભક્તો સમક્ષ ક્ષમાયાચના કરવી અનિવાર્ય છે, ત્યારબાદ જ તેઓ અયોધ્યાની મુલાકાતે આવે તે યોગ્ય રહેશે.

જાન્યુઆરી ૨૦૨૪માં ભવ્ય રામ મંદિરના ઉદ્ઘાટન બાદ અખિલેશ યાદવની આ પ્રથમ સંભવિત અયોધ્યા મુલાકાત હોવાનું મનાઈ રહ્યું છે, જેને લઈને રાજ્યના રાજકીય વર્તુળોમાં ગરમાવો આવી ગયો છે અને શાસક પક્ષ તથા વિપક્ષ વચ્ચે નિવેદનબાજી શરૂ થઈ ગઈ છે.

આ અગાઉ પણ અયોધ્યા આંદોલન અને રામજન્મભૂમિ વિવાદ સાથે જોડાયેલા ઘટનાક્રમોને લઈને રાજકીય પક્ષો વચ્ચે સતત ખેંચતાણ જોવા મળી છે, ત્યારે આગામી ૧૨ ડિસેમ્બરે યોજાનાર આ મુલાકાતને લઈને રાજ્યમાં આગામી દિવસોમાં વધુ રાજકીય હલચલ મચવાની પૂરી સંભાવના છે.