લખન  : ઉત્તર પ્રદેશમાં વર્ષ ૨૦૨૭ માં યોજાનારી વિધાનસભા ચૂંટણીને (UP Assembly Elections 2027) લઈને અત્યારથી જ રાજકીય ગરમાવો ચરમસીમાએ પહોંચી ગયો છે. નેતાઓ વચ્ચે આક્ષેપ-પ્રતિઆક્ષેપ અને તીખા નિવેદનબાજીનો દોર સત્તાવાર રીતે શરૂ થઈ ચૂક્યો છે. લખનૌમાં આયોજિત એક કાર્યક્રમ દરમિયાન સમાજવાદી પાર્ટી (SP) ના સુપ્રિમો અખિલેશ યાદવે શાસક પક્ષ ભાજપ (BJP) અને મુખ્યમંત્રી યોગી આદિત્યનાથ પર આકરા પ્રહારો કર્યા છે. અખિલેશે દાવો કર્યો છે કે જનતાના આક્રોશથી ડરીને ભાજપના વર્તમાન ધારાસભ્યો આગામી ચૂંટણીમાં પોતાના મતવિસ્તારો બદલવાની ગુપ્ત તૈયારીઓ કરી રહ્યા છે.
સપા પ્રમુખે ભાજપને ખુલ્લો પડકાર ફેંકતા કહ્યું, "જો ભાજપના નેતાઓમાં સહેજ પણ હિંમત હોય, તો તેઓ પોતાના વર્તમાન મતવિસ્તારમાંથી જ ફરી ચૂંટણી લડીને બતાવે. અમે સમાજવાદીઓ તેમના જ ગઢમાં તેમની ડિપોઝિટ જપ્ત કરાવવા માટે સંપૂર્ણ રીતે તૈયાર બેઠા છીએ." તેમણે કટાક્ષ કરતા ઉમેર્યું કે, સૌથી વધુ લખનૌના ભાજપના ધારાસભ્યો પોતાની સીટ બદલવાની ફિરાકમાં છે, પરંતુ જો તેઓ સીટ બદલશે તો અમે ત્યાંથી સમાજવાદી પાર્ટીના ધારાસભ્યોને જીતાડીને વિધાનસભા મોકલીશું.
'અમારી નકલ કરીને પીએમના મતવિસ્તારમાં ભોજન પહોંચાડ્યું'
પોતાની સરકારના કામોની યાદ અપાવતા અખિલેશ યાદવે કહ્યું કે, સપા સરકાર દરમિયાન શરૂ કરાયેલી ૧૦૯૦ મહિલા હેલ્પલાઇનના સુપ્રીમ કોર્ટે પણ વખાણ કર્યા છે. આ ઉપરાંત ગરીબ બાળકોને ગરમ અને પૌષ્ટિક ભોજન આપવા માટે શરૂ કરાયેલી 'અક્ષય પાત્ર' યોજનાનો ઉલ્લેખ કરતા તેમણે દાવો કર્યો કે, "અમે જે અક્ષય પાત્ર યોજનાના એમઓયુ (MoU) કર્યા હતા, તેનો ઉપયોગ પાછળથી વડાપ્રધાન નરેન્દ્ર મોદીના સંસદીય મતવિસ્તાર (વારાણસી) માં બાળકો સુધી ભોજન પહોંચાડવા માટે કરવામાં આવ્યો. અમારું ધ્યાન હંમેશા બાળકોના પોષણ પર રહ્યું છે."
સીએમ યોગીના 'એન્જિનિયરિંગ' પર અખિલેશના આકરા કટાક્ષ
યોગી સરકારના વિકાસ કાર્યોને આડેહાથ લેતા અખિલેશે શિક્ષણ અને ઇન્ફ્રાસ્ટ્રક્ચરના મુદ્દે મોટો દાવો કર્યો:
યુપીમાં એન્જિનિયરિંગ કોલેજો બંધ થઈ: "સમાજવાદી પાર્ટીએ યુવાનોને રેકોર્ડબ્રેક લેપટોપ વહેંચ્યા અને પૂર્વ રાષ્ટ્રપતિ (એપીજે અબ્દુલ કલામ) ના માનમાં એકેટીયુ (AKTU) યુનિવર્સિટીની સ્થાપના કરી, જેને આ ભાજપના લોકો નષ્ટ કરવા માંગે છે. આજે દેશમાં જો કોઈ રાજ્યમાં સૌથી વધુ એન્જિનિયરિંગ કોલેજો બંધ થઈ હોય, તો તે ઉત્તર પ્રદેશ છે."
મુખ્યમંત્રી યોગી આદિત્યનાથ પર સીધું નિશાન સાધતા તેમણે વ્યંગાત્મક લહેજામાં કહ્યું, "મુખ્યમંત્રી પોતે એટલા મોટા 'એન્જિનિયર' છે કે તેમણે લખનૌનો ૭,૦૦૦ કરોડ રૂપિયાનો ગ્રીન કોરિડોર જાતે જ ડિઝાઇન કરી નાખ્યો! આ પ્રોજેક્ટ કોઈ પ્રોફેશનલ એન્જિનિયરે નથી બનાવ્યો, એટલે જ જનતાએ અહીં ડગલે ને પગલે ટ્રાફિક અને મુશ્કેલીઓ વચ્ચે રોકાવું પડે છે." અખિલેશના આ ધારદાર હુમલા બાદ યુપીના રાજકારણમાં આગામી ચૂંટણી માટેનો માહોલ બરાબરનો જામી ગયો છે.