નવી દિલ્હી : ગ્લાસગો ખાતે યોજાયેલી ૨૦૩૦ કોમનવેલ્થ ગેમ્સમાંથી કુસ્તી અને શૂટિંગ જેવી ભારતની પરંપરાગત અને મજબૂત રમતોને બાકાત રાખવા સામે આમ આદમી પાર્ટીના સંયોજક અરવિંદ કેજરીવાલે સખત વિરોધ નોંધાવ્યા બાદ, કેન્દ્રીય રમતગમત મંત્રી ડૉ. મનસુખ માંડવિયાએ મોટું આશ્વાસન આપ્યું છે. મંત્રીએ સ્પષ્ટ કર્યું છે કે વડાપ્રધાન નરેન્દ્ર મોદીના નેતૃત્વમાં જ્યારે ભારત વર્ષ ૨૦૩૦માં કોમનવેલ્થ ગેમ્સની શતાબ્દી આવૃત્તિનું આયોજન કરશે, ત્યારે તેમાં તમામ મુખ્ય રમતોનો સમાવેશ કરવામાં આવશે અને ભારત અત્યાર સુધીના સૌથી વધુ મેડલ જીતીને ઇતિહાસ રચશે.

અગાઉ અરવિંદ કેજરીવાલે સોશિયલ મીડિયા પર પદક વિજેતા ખેલાડીઓને અભિનંદન પાઠવવાની સાથે સાથે શૂટિંગ અને કુસ્તી જેવી મુખ્ય રમતોને કોમનવેલ્થ રોસ્ટરમાંથી દૂર કરવા અંગે ઊંડી નિરાશા વ્યક્ત કરી હતી અને આ અન્યાય સામે અવાજ ઉઠાવવા જણાવ્યું હતું. કેજરીવાલના આ વિરોધ અને રમત જગતની ચિંતાઓને ધ્યાનમાં રાખીને કેન્દ્રીય મંત્રી મનસુખ માંડવિયાએ પ્રતિક્રિયા આપી હતી કે નવું ભારત રમતગમતમાં કોઈ સમજૂતી નહીં કરે.

ઉલ્લેખનીય છે કે ગ્લાસગો ગેમ્સના સમાપન સમારોહમાં કોમનવેલ્થ ગેમ્સનો ધ્વજ સત્તાવાર રીતે ભારતને સોંપવામાં આવ્યો છે, જે દર્શાવે છે કે વર્ષ ૨૦૧૦ની દિલ્હી ગેમ્સ બાદ હવે ૨૦૩૦માં પ્રથમ વખત ગુજરાતના અમદાવાદ શહેરમાં આ મહાકુંભનું ભવ્ય આયોજન થવા જઈ રહ્યું છે. સરકારના આ નવા નિવેદનથી ભારતીય રમતવીરો અને ચાહકોમાં ઉત્સાહની લહેર દોડી ગઈ છે.