નવી દિલ્હી: દિલ્હી-એનસીઆરની સૌથી વ્યસ્ત ગણાતી દિલ્હી મેટ્રોની બ્લુ લાઇન (પર આજે સવારે એકાએક મોટો હોબાળો મચી ગયો હતો. એક ભયાનક ટેકનિકલ ખામીના કારણે મેટ્રો સેવાઓ છેલ્લા અડધા કલાકથી સંપૂર્ણપણે સ્તબ્ધ થઈ ગઈ છે. કૌશામ્બી સ્ટેશન નજીક ઓવરહેડ ઇલેક્ટ્રિક વાયરમાં ખામી સર્જાવાને કારણે આ આખી લાઇન પર ટ્રેનોના પૈડાં થંભી ગયા હતા. ખાસ કરીને આનંદ વિહાર સ્ટેશન પર ટ્રેનો અધવચ્ચે ફસાઈ જતાં મુસાફરોની ચિંતામાં મોટો વધારો થયો છે.

ટેકનિકલ ખામી સર્જાતાની સાથે જ આનંદ વિહાર સહિતના તમામ પ્રભાવિત સ્ટેશનો પર અચાનક લાઉડસ્પીકર પરથી ગભરાટ ભરેલી જાહેરાતો શરૂ થઈ ગઈ હતી, જેમાં મુસાફરોને વિનંતી કરવામાં આવી રહી હતી કે, "કૃપા કરીને બધા મુસાફરો ટ્રેન છોડીને બહાર નીકળી જાઓ." આ અણધારી જાહેરાત સાંભળતાની સાથે જ ટ્રેનની અંદર અને પ્લેટફોર્મ પર ભારે નાસભાગ અને અંધાધૂંધીનો માહોલ સર્જાયો હતો. સવારના સમયે ઓફિસ, કોલેજ કે કામધંધે જવા નીકળેલા હજારો મુસાફરો ટ્રેનોમાંથી નીચે ઉતરવા મજબૂર બન્યા હતા, જેના કારણે સ્ટેશન પરિસરમાં પગ મૂકવાની પણ જગ્યા બચી ન હતી.

દિલ્હી મેટ્રો રેલ કોર્પોરેશન (DMRC) ની એન્જિનિયરિંગ ટીમ યુદ્ધના ધોરણે આ ઓવરહેડ વાયરની ખામીને સુધારવાના પ્રયાસોમાં લાગી ગઈ છે, પરંતુ મુસાફરોનો આક્રોશ સોશિયલ મીડિયા પર સતત વધી રહ્યો છે. ટ્રેનો બંધ થવાને કારણે સ્ટેશનોની બહાર ઓટો, ટેક્સી અને બસો મેળવવા માટે પણ લાંબી લાઈનો લાગી છે, જેનાથી આખા વિસ્તારમાં ટ્રાફિક જામની સ્થિતિ સર્જાઈ છે. મેટ્રો પ્રશાસન વહેલી તકે સેવાઓ સામાન્ય કરવાનો દાવો કરી રહ્યું છે, પરંતુ ત્યાં સુધી દિલ્હી-એનસીઆરના મુસાફરોને ભારે હાલાકી વેઠવી પડી રહી છે.