બેંગલુરુ:  છેલ્લા કેટલાક દિવસોથી કર્ણાટકમાં પેટ્રોલ અને ઇથેનોલ મિશ્રણને લઈને સર્જાયેલો રાજકીય અને ટેકનિકલ વિવાદ હવે ચરમસીમાએ પહોંચ્યો છે. રાજ્યના કેટલાક પેટ્રોલ પંપો પર વેચાતા પેટ્રોલમાં નિર્ધારિત મર્યાદા કરતાં વધુ, એટલે કે ૨૬% થી ૩૧% સુધીનું ઇથેનોલ ભેળવવામાં આવતું હોવાના સનસનાટીપૂર્ણ અહેવાલો સામે આવ્યા બાદ કેન્દ્ર સરકારે આ મામલે આકરું વલણ અપનાવ્યું છે. શનિવારે કેન્દ્રીય પેટ્રોલિયમ અને કુદરતી ગેસ મંત્રાલયે કર્ણાટક સરકાર અને સ્થાનિક તપાસના દાવાઓને સરેઆમ ફગાવી દેતાં સ્પષ્ટ કર્યું કે દેશની ત્રણેય સરકારી તેલ કંપનીઓ—ઈન્ડિયન ઓઈલ (IOCL), ભારત પેટ્રોલિયમ (BPCL) અને હિન્દુસ્તાન પેટ્રોલિયમ દ્વારા સપ્લાય કરાતું E20 પેટ્રોલ સંપૂર્ણપણે ગુણવત્તાયુક્ત છે.

રાષ્ટ્રવ્યાપી ગુણવત્તા નિરીક્ષણ અભિયાન હેઠળ દેશના ૨૭ રાજ્યો અને કેન્દ્રશાસિત પ્રદેશોમાંથી એકત્રિત કરાયેલા ૮૯૩ સેમ્પલોની કડક તપાસ કરવામાં આવી હતી. મંત્રાલયના જણાવ્યા અનુસાર, કર્ણાટકમાંથી લેવામાં આવેલા તમામ ૫૬ નમૂનાઓ ભારતીય માનક બ્યુરો ના કડક નિયમો નું સંપૂર્ણ પાલન કરે છે અને તેમાં ઇથેનોલનું પ્રમાણ આદર્શ મર્યાદામાં એટલે કે ૧૯% થી ૨૦% ની વચ્ચે જ મળી આવ્યું છે. આ સાથે જ તેલ માર્કેટિંગ કંપનીઓ (OMCs) એ ઓક્ટોબર ૨૦૨૬ દરમિયાન કર્ણાટક રાજ્ય પ્રશાસન દ્વારા અપનાવવામાં આવેલી સેમ્પલિંગ અને લેબ ટેસ્ટિંગ પદ્ધતિઓની કાયદેસરતા સામે જ ગંભીર પ્રશ્નો ઉઠાવ્યા છે.

મંત્રાલયે સ્પષ્ટતા કરી છે કે પેટ્રોલ-ડીઝલના નમૂના લેવા માટે આવશ્યક ચીજવસ્તુ અધિનિયમ, ૧૯૫૫ અને માર્કેટિંગ શિસ્ત માર્ગદર્શિકા ૨૦૨૪ હેઠળ ૬ એક-લિટરની બોટલમાં સેમ્પલ લેવાની કાયદાકીય પ્રક્રિયા નિર્ધારિત છે, જેનું પાલન કર્યા વિના કરવામાં આવેલા ટેસ્ટ અમાન્ય ગણાય. સેન્ટર ફોર હાઇ ટેકનોલોજી  દેશના દરેક પંપ પર ઉચ્ચ ગુણવત્તાયુક્ત બળતણ જ સુનિશ્ચિત કરી રહ્યું છે. સરકારે સ્પષ્ટ કર્યું છે કે સત્ય સામે લાવવા માટે સ્થાપિત કાનૂની માળખા હેઠળ તેલ કંપનીઓ અને સ્વતંત્ર પ્રયોગશાળાઓ દ્વારા સંયુક્ત રીતે ફરીથી ચકાસણી કરવામાં આવશે.