​મુંબઈ: મહારાષ્ટ્રના રાજકારણમાં વધુ એક મોટો વિવાદ વકર્યો છે. નાયબ મુખ્યમંત્રી એકનાથ શિંદેએ મુંબઈના સુપ્રસિદ્ધ શ્રી સિદ્ધિવિનાયક મંદિરના દાનમાં ગેરરીતિઓ થઈ હોવાનો ગંભીર આરોપ લગાવતા ખળભળાટ મચાવી દીધો છે. રાજ્ય વિધાન પરિષદમાં બોલતા શિંદેએ દાવો કર્યો હતો કે અગાઉની મહા વિકાસ આઘાડી સરકાર દરમિયાન સિદ્ધિવિનાયક મંદિરના દાનપેટીમાં મોટા પાયે 'લૂંટ' ચલાવવામાં આવી હતી.

​શિંદેના દાવાઓ અને તર્ક:

એકનાથ શિંદેએ અયોધ્યાના રામ મંદિરમાં દાન ગણતરીમાં કથિત ગેરરીતિઓ મુદ્દે વિપક્ષ દ્વારા કરવામાં આવતી ટીકાઓનો જવાબ આપતા આ આક્ષેપો કર્યા હતા. શિંદેએ કહ્યું કે, "જે લોકો રામ મંદિર મુદ્દે સવાલ ઉઠાવી રહ્યા છે, તેઓ જ્યારે સિદ્ધિવિનાયક મંદિરની દાનપેટી લૂંટાઈ રહી હતી ત્યારે કેમ ચૂપ હતા?" આ દરમિયાન તેમણે કેટલાક દસ્તાવેજી પુરાવાઓ હોવાનો દાવો પણ કર્યો હતો અને સવાલ ઉઠાવ્યો હતો કે તે સમયે આ બાબતે કોઈ તપાસ કેમ ન થઈ? જોકે, શિંદેએ તેમના સંબોધનમાં પૂર્વ ટ્રસ્ટ ચીફ આદેશ બાંદેકરનું નામ સીધું નહોતું લીધું, પરંતુ નિશાન તેમના પર જ હોવાનું સ્પષ્ટ દેખાતું હતું.

​આદેશ બાંદેકરનો વળતો પ્રહાર:

શિંદેના આ આક્ષેપો બાદ પૂર્વ ટ્રસ્ટ ચીફ આદેશ બાંદેકરે સખત શબ્દોમાં જવાબ આપ્યો છે. બાંદેકરે આ તમામ આરોપોને પાયાવિહોણા ગણાવીને ફગાવી દીધા છે. તેમણે પોતાની સફાઈ આપતા જણાવ્યું હતું કે, તેમનો કાર્યકાળ ત્રણ વર્ષ પહેલા જ પૂર્ણ થઈ ગયો છે અને મંદિરના કાર્યકારી અધિકારીઓ તેમજ નાણાકીય અધિકારીઓની નિમણૂક રાજ્ય સરકાર પોતે કરે છે.

​બાંદેકરે આક્રોશ વ્યક્ત કરતા કહ્યું, "જો કોઈ પણ પ્રકારની ગેરરીતિ સાબિત થાય, તો હું તૈયાર છું. મને મંદિરની સામે લઈ જઈને ફાંસી આપી દો, પરંતુ ખોટા આક્ષેપો કરીને મંદિરની પ્રતિષ્ઠા ન ખરડશો." સાથે જ તેમણે આખા મામલે નિષ્પક્ષ તપાસ કરાવવાની માંગ કરી છે જેથી સત્ય બહાર આવી શકે.

​રાજકીય ગરમાવો:

અયોધ્યાના રામ મંદિરમાં દાન ગણતરીમાં ગેરરીતિના કિસ્સા બાદ રાજ્યમાં મંદિરના દાન અને તેની વ્યવસ્થાને લઈને રાજકીય નિવેદનબાજી તેજ બની છે. શિંદેના આ આક્ષેપોને મહારાષ્ટ્રના રાજકીય વર્તુળોમાં આગામી સમયની મોટી રાજકીય લડાઈ તરીકે જોવામાં આવી રહ્યા છે. આ સમગ્ર ઘટનાક્રમ બાદ હવે સિદ્ધિવિનાયક ટ્રસ્ટના વહીવટની તપાસ કરવામાં આવશે કે કેમ, તે જોવું મહત્વનું રહેશે.